Zanlai Au Aw Mamit Division tlawh report

/, Uncategorized/Zanlai Au Aw Mamit Division tlawh report

Zanlai Au Aw Mamit Division tlawh report

Zanlai Au Aw Mamit Division tlawh report

A hmun : Sairang Biakbuk, Sairang.

A hun : Dt. 23rd June, 2013. 11:00am

Chairman : Pu Lianzuala, Sairang.(Mamit division chairman)

Programme tlangpui te :

A hmasa berin puan tur awm apiang ngaihthlakna hun hawn a ni. Chumi zawh ah chairman in programme hman dan tur a rawn puang a, Bible chhiar(Matt. 24:12-13, Tirh. 20:23-24) leh tawngtaina a neih zawh hnu ah division huam chhung a Zanlai Au Aw pual a palai kal zat report na hun neih ani. Palai kaldan chu hetiang in :

1. Kawrtethawveng  – Nil

2. Bunghmun          – Nil

3. Khamrang            – Nil

4. Phuldungsei        – pahnih

5. Kawnmawi           – Nil

6. Dapchhuah          – Nil (Dapchhuah ho hi sumo in an rawn kal a, vanduaithlak takin Rawpuichhip ah an motor ke a chhiat tak hlauh avangin an rawn kal zel thei ta lova, tihngaihna a awmloh avangin an let leh ringawt mai ni awmin thu kan dawng)

7. Phaileng               – Nil

8. Hreichuk              – pahnih

9. Khawrihnim         – pahnih

10. Darlung             – pakhat

11. Kelsih                        – Nil

12. Lungleng            – pakhat.

Tichuan an vaiin palai kal zat chu mi pariat anni. Hemi zawh ah division huam chhung khaw tin atangin Zanlai Au Aw report ngaihthlakna neih leh ani:

1. Khawrihnim – Cell aiawh in Lalhlimpuia (Lam-a) a rawn dingchhuak a, han report em em tur a neihloh bakah kan hun hman dan tur an hriat lawk loh avang a inpuahchah ngaihna pawh hre vaklo ni awm a rawn insawiin tunah copies 125 an sem mek a, a man hi Secretariat ah June thla thleng hian an pek tawh thu a rawn sawi a, an hmalakna chu Khawrihnim, Lungdar leh Reiek te an ni.

2. Hreichuk – Cell treasurer Laltlankima(Mapuia) a rawn ding a, an hmalak dan te NUNG takin a rawn report a, thalai te pawh an thinlung Jerusalem kulha chim vek avangin Zanlai Au Aw ah pawh hian a chim vek tawh a, nimahsela Lalpa’n Nehemia thlarau kaltlang a kulh a rawn tundin leh hnu ah hian Zanlai Au Aw ah pawh tan la tharin Lalpa anlo hralh tawhna hmun ngei ah Amah hmangaihna he Zanlai Au Aw hmang ngei hian kan la let leh a ni tiin an hmalakna te a rawn sawi a, tunah hian copies 182 sem mek in an hmalakna chu Kanghmun ani.

3. Sabual/Darlung – An Veng aiawh in Pa Mawia a rawn ding a, an nihna diktak rawn sawiin thalai an neihloh zia te, helam a a rual awh zia te leh amah hi thalai chu anih deuh mai thu te a rawn sawi a, tunah hian copies 40 hi a thlawn a sem in vawiin ni ngeiah pawh report pek pah a thlarau lam a pur chaw tur a rawn kal anih thu te a sawi ani.

4. Phuldungsei – Anni hian report tur an la nei tehchiam lova, an kaw aiawh in Sailianpuia a rawn ding a, kumin 2013 hian Cell pawh an din ve chauh thu leh an din atang erawh chuan thla tin vawi khat inkhawmna an la neih ziah thu a rawn sawi a, tunah hian copies 110 sem mek in Pukzing leh Saithah a hmalak leh an tum thu a rawn sawi a ni.

5. Lungleng – atangin Tluanga rawn ding a, tunhma lam a anlo kalpui dan thin a rawn sawi hmasa in chhung tin te mawhphurhna an inpek thin thu a rawn sawi a, tunah chuan a semtu te ah kulh a chim tawh avangin copies 22 chiah an sem tawh a, Cell pawh ding ve bawk mahse OB nih a fawmkem vek thu te rawn sawi in Lalpa’n a chhiahhlawh kaltlang a min pek hi ka ziak thiam ve lova, lawm taka sem hi ka tihtur a ni tih min hriattir ani tiin report a rawn pe a ni.

6. Sairang – A tawp berah Sairang atangin kan ex-officio member leh Cell convener ni bawk pu R. Malsawma (pa Mala) a rawn ding ve leh a, kum 2008 vel a an hmalak tawh thin dan leh khatih hunlai a an phur thin zia leh ram chanchintha hril hi nuam an tih thin zia te, Sairang mai nilo a chhehvel a khaw awm ho ah te pawh anlo feh chhuahpui tawh thin thu te rawn sawiin hun lo kal zel ah ba te alo tam ta a, cheng singkhat lai an bat tak avangin 2011 kum khan Sairang leh Lengpui ah chiah hma lo tawh ila tiin thu an passed a, sub-agent pawh la tawh lovin chhungtin te mawhphurna ni tawh rawhse tiin subscriber te pawn aman an pe thalo anih pawh in a kim a submit zel tura infuih a hma an han lak tak hnu chuan an lo bat tawh cheng singkhat an recover bakah cheng sangruk a an hlawk tak thu te rawn sawiin aman pawn secretariat ah chuan an up to date a, an sem bang tlem azawng hmang hian hmathar lak leh an tum thu rawn sawiin tunah hian Sairang ah copies 64, Lengpuia ah copies 491, avaiin copies 555 an sem mek ani.

Report te ngaihthlak zawh anih hnu ah Board aiawh te koh anni a:

 Pu Mazama rawn ding hmasa berin Bible chang, Nehemia 2 :14-18, Eze. 36:20, a rawn chhiar a, thlante thinlung a Jerusalem kulh a chim tawh zia mahni atang a tan in a rawn sawi a, Zanlai Au Aw kulh ngei pawh a chim vek ani tih rawn sawiin kanlo tluk san tawhna zawng zawng ata tho leh in Lalpa tan a kan kulh kan tun din lehna chu Zanlai Au Aw hmang hian a ni tiin a rawn sawi a.

Pu JC a rawn ding leh in Kohhran origin, Abrahama ang a kan chipui Zofate laka a hrang hlak a lakchhuah leh din kan nih thu te, chu hnam thianghlim nihna chu kan thinlung a kulh a chim tawh miau avang a kan lo bosalh tawh zia te he Zanlai Au Aw hi Lalpa’n ‘Josepha buhzem’ ti a min address sak dan te rawn sawiin vawiin ni ah pawh hian Krista hmangaihna hian min tirlui leh rawhse tiin a rawn sawi.

        A tawp berah Pa Rina a rawn ding a, Zanlai Au Aw hi khul mai lovin i sem ral hrim hrim ang u tiin a rawn sawi a, Josepha buhzem a chaw tak hi dan kohhran takah chuan tam a tlak tawh avangin sem turin Lalpa’n min ti a ni, min dinthar leh a ni. Lalpan luangchhuak turin min ti a, keini chuan Adama thisen leh babulon ho zarzawm nan a hmangin kan thinlung a kan ro zawng zawng te kan lo hmuh tirin minlo chhuh zo tawh a, nimahsela Lalpan kulh min rawn din sak lehna ah hian Jerusalem kulh chu ni a tlangsan fe hma chuan hawnglo turin min rawn ti a ni. Josepha chu Aigupa ah pawh chawimawiin a awm mek a, ami te thinlung ah hian chawimawi hi a duh a ni. Aigupta leh Kanan hian Josepha buhzem hi an tlan a ani, tih thu rawn sawiin Lalpa chhiahhlawh in Zanlai Au Aw thuchah  a rawn chhiarchhuak bawk.

        Tichuan banna hla ‘Isua hming a sang ber’ tih Pu Bawla, Sairang in a rawn thlang a kan sak zawh hnu a hun tawp tawngtaina Pu Lalngheta Sailo in a hman hnu ah theitui tui tak a hmeh nen kan ei zawh hnu ah kan tin ta a ni.

        Hemi ni hian khua lum hle mahse zai a nuam em em a, kan unaute zing a tisa mi ber pawh rawn tel se a tuiral ve vek dawn a ni tih hi a boruak hian a hril chiang hle a ni.

 

 

 

 

By | 2013-06-26T16:42:11+00:00 June 26th, 2013|News, Uncategorized|0 Comments

About the Author:

Leave A Comment