Khawvel hunpui hi a lo inthlak hlawk hlawk tawh thin a. Indona nise, Indopui I-na leh II-na a liam tawh a. Tunah hian Indopui III-na hmachhawn turin Khawvel hi a insingsa ta mek a ni. Ziaktu ropui thenkhat te chuan Khawvel Indopui III-na hi thleng theiin an ring lo va, an rin lohna chhan chu-

(1) Ram changkang ho hian Indopui han hmachhawn leh chu an peih tawh an ringlo a ni.

(2) Ram leh ram inkara innghirnghona a lo thlen pawhin  inremna atana ralthuam tha ber chu dawhkan khat kila inbiakna neih a ni tih an hriat tawh avangin.

(3) Khawvel tihchhiat theihna Atom Bomb te hi Khawvel mihring finna lo sang zel hian Khawvel ata tihboral an la duhzawk an ring a ni. Han ngaihtuah mai chuan a dik hmel hle a. Mahse Bible ah hian Indopui lo thleng tur a sawi, la thleng si lo hi a awm tlat. Indopui-I leh II-na kha a ni mai lo maw? Ni thei lo. A chhan chu khang indopuite kha Middle East (Jerusalem) ah an intan tlat lo. Indopui III-na hi chu Middle East (Jerusalem) ah a intan dawn tih Bible eng atangin kan chhut dawn a ni.

             Indopui III-na lo thleng tur chu tiang hian Bible ah a chuang a:-

 1. “ Muanna leh himna tia an sawi lai takin, hmeichhe nau vei angin, chawp leh chilhin boralna an chungah a thleng ang a, an pumpelh tawp lo vang.” (II Thess 5:3)

2. “ Hmar lam lal chuan tawlailir nen, sakawr chung chuang mi leh lawng tamtakte nen thawngaleivir ang maiin amah chu an bei ang.” (Daniala 11:40)

3. “I chho ve ang a, thlipui ang maiin I lo thleng ang a, chhumin ram a tuam ang mai hi a ni ang, nang leh I hnena mi tam takte chu.” ( Ezekiela 38:9)

4. “ Ram ropui chu an lut ang a, a chim hneh ang a, a pal tlang ang. Ram ropui pawh chu a lut ang a, tamtak chu tihtluk a ni ang.” (Daniala 11:41)

5. “Jerusalem do turin hnam zawng zawng ka khawm dawn si a, khawpui chu lak a ni ang a, inte pawh chu rawk a ni ang a, hmeichhiate chu nghaisak an ni ang; khawpui zatve chu sala hruai chhuahin an awm ang a, mipui la awmchhunte chu khawpui ata tihbo an ni lo vang.” (Zakaria 14:2)

6. “Chumi niah chuan, Israel ramah lir nasa takin a nghing ngei ang; chutichuan, tuipui sangha te, chungleng sava te, ransa te, lei chunga vak rannung zawng zawng te, lei chunga mihring zawng zawng te ka hmaah an khur ang. Tlangte hial tihhniamin an awm ang a, kham te a chim ang a, kulh bang tin leiah a tlu ang…Thisen chhuah leh hripuiin amah ka bei ang; amah leh a sipai rualte leh a hnena mi tam takte chungah chuan, ruahpui vanawn leh rial nasa tak leh mei leh kat te ka surtir ang.” (Ezek. 38:19-22)