Infiamna: Games & Sports hi thim thiltih rah nei ngai lo zingah han telh ta rawih ila chuan thangtharte chuan mi hawizau lo leh chinchang hre lo tawpah min ngai ngei ang le. Mahse i han chhût chiang teh ang aw. Games & Sports hian thlarau hran a nei asin ! Chu thlarau chu min a chan loh chuan Games & Sports-ah mi hlawhtling a ni ngai lo vang. Mi tupawhin chu thlarau chu a chan tawh chuan thildang chu sawi loh, Pathian meuh pawhin a thinlungah hmun a chang thei tawh lo. Kan thian pakhat pawhin Carrom board thlarau a chan tawh thu leh, chutih hunlai chuan Pathian thu reng reng a ngaihtuah theih loh thu min hrilh a. Chu infiamna chu a thlah fel hnuah chauh Pathian lam a ngaihtuah thei ta a ni awm e.  “ Carrom board ka khelh hrât lai tak tak chuan ka inkhawm ve pawhin inkhawm chairman te hi ka cut lut ka cut lut mai a ni,” a ti. Chutiang tho chu Football khel thin te, Tennis khel thin te, Cricket khel thin te etc. pawh an ni vek tho.  Chuvangin Games & Sports hi thim thiltih rah nei ngai lo Bible-in a tih zinga tel a ni chiang khawp mai. Pathian tan i thinlung i kian dawn tak tak anih chuan thildang reng rengin i thinlungah lalna an chang thiang lo tih hria ang che. Thil reng reng an nihna baka zu hlut chu sual a ni. Eng thlarau mah hi chang tur kan ni lo, Pathian thlarau chauh lo chu.

          “Lalpa ka nunna zawng zawng ka pe che,

           Tunah ka rilru a lungngai em em.

           Ka taksa ka pe che ka rilru nen,

           Min theihnghilh suh la, ka hmangaih ang che.”

“Lalpa in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tur a ni.” (Deut. 6:5)