Rimawi: Lal Davida hian Music hi a chawivul hle mai a. Khuangte leh lama Pathian fak turin min duh a ni. Tingtang ri thum mi te, ri chi hrang hrang tea fak tur niin a sawi. Engkim thaw thei tawh phawt chuan fak se, chu fakna chu phu hliah hliah hian a hria a ni. Lal Davida thinlung atang chuan a dik thlap mai reng a. Khawvel intihhlimna tinrengah pawh music hian hmun pawimawh tak a luah reng a ni.  Anih loh leh music hian ringtute nun a siam that zawk nge i rin a tihchhiat zawk? Hnam tin hian kan hnamin a pianchhuahpui, hnam culture-a bet sa thlap music kan nei deuh zel a, hei hi chuan min tihchhiat a rinawm lo; mahse hnamdang music kan chawkluh chawp te hi chuan min siam thatna aiin min khawih chhiatna a tam zawk thei ang. Heavy metal music biak in chhunga kan lakluh atang khan thlarauvah kan kang hlauh thung a ni mai lo maw? Mizoten thlarauva Pathian kan fakna tak tak chu khuang tê leh khuangpui kan chumchilh hian a ni ber fo mai. Western music hi chuan thawk leh khatah rilru phurna a kaitho ur ur a, mahse thlarau thleng tak tak si lo hian a thamral leh thin a ni ber. Music ri bur bur nen hian sapho mittui chu a lo sur thin a nih pawhin a mawh lo, an culture-a bet a ni miau alawm; keini Zo fate zingah thung chuan music ri  bur  bur vanga mittui tla kan tlem hmel hle a ni. Mal zai(solo) nan erawh music hi a remchang tih loh rual a ni lo. Zaipawl thiam tak mai an zaina phena music lo ri dup dup hi chu han hnawl phal mai chi chu a ni awm lo ve. Thil engpawh hi Thlarau Thianghlimin a hman chuan a dik thlup thin. Chuti anih chuan a hun leh hmun thliar thiam a pawimawh ber fo dawn anih chu. Music luh chilh vak mai hi thlarau mite tan chuan a \hat ka ring lo. Music hian thlarau a tida duh em mai. Kohhran pawhin music kan uar apiangin thlarauvah kan kang fo thin a ni. Thangthar lo la awm zel tur te ngaihtuahin engang taka music hi kalpui chi nge anih tih hriat thiam a har hle.

 

          Ka han sawi tum tak zawk erawh chu khawvel kristianna lo dal chho mek zelah hian music hi Setana hmanraw tha  leh pawimawh tak, ringtute thlarau a tih chauh sakna hmanraw \ha elkhen a ni tih hi a ni. Music chuan mihring a ti zauthauvin phurna danglam tak a kaitho thei a. Kohran a tikhawvel a, ringtute tisamiah a chantir thuai thin. Chuvangin kohhranah music hi dah chungnun chi a ni lo. Tel ve chauh tura ngaih chi a ni. Khawvel mite intihhlimna music lek phei hi chu hawisan hlauh tur a ni a, an huau huau siam te chu thihsan vang vang tur a ni tawp mai. Kan telvena tur a ni eih lo. Heng entertainment-a music phei hi chu Setana ta liau liau a ni tih kan hre reng tur a ni. Chumi awmzia chu Setanan  Pathian aiin music a ngah zawk tihhi a ni. Mi thenkhatin Setana music chu chhuhsakin Pathian kan pe tur a ni tih ngaih dan dik hmel tak hi an sawi thin; hei pawh hi a theih loh. Tih tak takah chuan mi tupawhin music hi thiam tak tak a tum chuan a thlarau chang khawpa rilru a pek a ngai tlat. Chuti anih chuan thinlung leh rilru leh thlarau leh chakna zawng zawngin Lalpa chu engtin nge kan hmangaih theih tak ang ?