Pu H. Lalvuana hi kum 1952 khan Sumsuih khuaah a lo piang a. A pa chu Thanglura(L) niin a nu chu Lalengi (L) a ni. Pianpui unau pariat neiin amah hi an unau zingah piang hmasa pali-na a ni a, an unau chu hengte hi an ni:-

  1. Sangkungi
  2. Chhiarthangpuii (L)
  3. Zapuithanga (L)
  4. Sanglawma
  5. H. Lalvuana h/o Lalthanpari
  6. Lalparmawii (L)
  7. H. Laldanglovi
  8. H. Lalsawta
  9. Rosiamliana (L)

Kum 1975 ah Pi Lalthanpari nen inneiin fa pawh pali an nei a, chung an fate chu:-

  1. Vanlalhruaia h/o Chhuani
  2. Julie Zohmingliani w/o S. Lalzara
  3. H. Lalnunsanga h/o Malsawmi
  4. Mimi Lalhmangaihi te an ni.

          Kum 1971-ah 1st Bn. MAP-ah Constable niin sawrkar hna a thawk tan a, mi rilru tluang leh hotute thu awih thei tak a ni a, an hotute mit a tlung thin hle. An hunlaiah lehkha zir sang pawl a nih avangin office hna pawimawh tak tak an chelh tir thin a. Hotute duhsakna lawmawm tak dawngin a sawrkar hnaah hian promotion pawh a hmu chak hle a ni. Kum 1991-ah Sub-Inspector of Police ah a kaisang a, 2nd Bn MAP Lunglei ah post niin an chhungin Lungleiah an insawn phei nghe nghe a. Kum 2000-ah Inspector of Police ah a promotion leh a, 5th IR Bn Khawzawl ah a awm leh a, chuta tang chuan 1st Bn MAP ah transfer a ni leh bawk. Kum 2011-ah MPS ah a kaisang a, 1st Bn MAP ah Asst. Commandant niin, kum 2012-ah khan sawrkar hna atangin a chhuak hlen ta a ni.

          A hnathawh chhung zawng hian fel tak leh rinawm takin a thawk thin a, an hotute leh a ma hote ngei fak leh ngainat a hlawh nasa em em thin. Reward pawh vawi tam tak hmuin, Constable atanga Dy. SP anih thlengin hrem vawikhat mah a tawk lo a ni.

          Nu leh pa atanga Lalpa tih mi, chhungkaw inenkawlna tha leh puitling tak an ni a. Kohhran tana theihtawpa inhmang thin a ni. Kum 1984 a Aizawl Bara Bazar a Lalpa Chhiahhlawh Dr. L.B. Sailo kraws thuchah a ngaihthlak atangin a nun nasa takin a inher danglam a. Kraws kawng hlu tak chu zawh ve turin a thinlung a inpeih nghal a. A muthilh ni thleng hian duhtaka a lo zui, do nate leh hmuhsitna tam tak a lo paltlang pui ngei chu nghet takin a vuan tlat reng a ni. Kohhran tana a nun zawng zawng hlantu a ni a, sum leh pai, tha leh zung mai bakah thlarau lam nunah pawh mite entawn, nu leh pa dik tak nih tling a ni. Kohhran din tirh atangin ‘Thutak Ban’ a ni a, kohhran inrelbawlna puitling taka a lo pian chhuah pawhin Executive Member ni pha ngat a ni. Tunah hian Chawlhhmun kohhranah pawh chairman hna chelh lai a ni. Hei mai bakah hian Board hrang hrangah hna pawimawh tak chelhin chairman, secretary, advisor leh patron ahte a awm thin a, a muthilh ni thleng pawh hian a kumte lo tam chho chungin Building Advisory Board ah Secretary nihna a la chelh ta tang tang a ni.

          Hetiang khawpa Lalpa hmangaihtu, Krista Kohhran humhalh thintu, a theihna zawng zawng kohhran tana hlantu hi an vang khawp ang. Mihringte chhiara kumte a lo tam chhoh ve a, a lo upat ve deuh hnu hian taksa lamah harsatna neuh neuhin a tlakbuak chho ve a. Zunthlumte neiin chauh nghulh changte pawh a nei thin. Chuti chung chuan unaute hriat hlauin, tlawmngai takin a Lalpa rawng a bawl ngat ngat thin a. Kar liamta atang khan a taksa a chauh deuh riau vangin a inentir a, investigation ti hmasa turin hriattir a ni. Investigation tul ang ti turin Dt. 06.10.2015 (Thawhleh Ni) tlai khan Aizawl Hospital-ah an in admit a, buaina leh harsatna nei nia a lan loh avangin muangchanga investigation kal pui chhoh tura tih a ni a. Chutia ngaih ngam taka an awm lai chuan Zunthlum leh Lung natna hnathawh avangin luhaiin a tlu thut mai a, Doctor leh Nurse rual ten a nunna chelh tuma theih tawp an chhuah laiin zan dar 9:50 p.m. khan rinawm taka rawng a bawl sak thin, a chhandamtu hnenah chatuan lawmman hlu tak chang turin a lo muhil ta a ni.