Pathian Rilru

Pathian Rilru

          MOSIA KOH ANIH DAN. Pathian rilru thuk tak chu Mosia koh anih khan a lo lang leh a. Abrahama hmanga a hnam dinchhuah Israel hnam sawm leh hnam hnih te chu Aigupta salah kum 430 tehmeuh an saltang a. An saltanna te chuan namen lova tiduhdahin an chhawr rethei thin a. Aigupta mite hian an ui leh ar tlukah pawh an ngai lo a ni. An vawk a riltam chuan chaw an pe a, an ui a tuihal chuan intur tui an pe a, an ar a riltam chuan chaw an pe thin. Mahse Jakoba thlahte erawh chuan an ril a tam pawhin khawngaih an hlawh lo va, an tui a hal pawhin in tur an hlawh hek lo; chutiang dihmuna an din chuan an hmusit zawk a. Chutiang taka an mangan lai chuan an mangang au thawm chuan Pathian beng a lo thleng ta a ni. Hnimbukah Pathian a rawn inlar ta. Mosian a puzawn Jethroa beram a ven lai takin hnimbuk chu a rawn alh hluah hluah a, mahse a hnim chu a kang si lo.  Mosia chuan ,”Hnimbuk alh hluah hluaha kang si lo chu mak a ti a, a enfiah tura ava kal chuan, “ Mosi, Mosi, lo hnai suh, i dinna kha lei thianghlim a ni e, i pheikhawk kha phelh rawh,” a lo ti a. Mosian a pheikhawk a han phelh hnu chuan Lalpa chuan, “ Aigupta rama ka mi awmte chu an hrehawmzia ka hmu reng asin, anmahni vengtute avanga an au thawm te chu ka lo hria a, an lungngaihna te chu ka hre reng si a; tichuan Aigupta lak ata chhanhim tur leh chumi ram ata hruai chhuaka, Kanaan- hote, Hit-hote, Amor-hote, Periz-hote, Hiv-hote, Jebus-hote awmna ram tha tak leh zau tak, hnutetui leh khawizu luanna rama hruai lut turin ka lo chhuak ta a ni. Tin, ngai teh, Isarela thlahte au thawm chu ka hnen a lo thleng e: chu chang a ni lo va, Aigupta hovin an hnehchhiahzia chu ka hmu reng a ni. Chuvangin hawh teh, ka mi Israela thlahte chu Aigupta ram ata hruai chhuak turin Pharoa hnenah ka tir ang che,”a ti a.

           Mosia chu a pha nasa hle mai a.  “Engtin nge Israel mipui chuan nangin an hnenah mi tir tih an hriat theih ang? Tunge i hming?” te a ti chul a. Pathian chuan ka hming chu, ‘Awma ka ni.’ An hnenah, “Awma chuan in hnenah mi rawn tir a ni,” i ti dawn nia. “Tin, kei hi in thlahtute Pathian, Abrahama Pathian,  Isaaka Pathian, Jakoba Pathian chu ka ni a, chu chu kum khuaa ka hming chu a ni. An puipate i khawm ang a, chutianga i sawi chuan an ring ang che,” a ti a.  Chuti chung chuan Mosia chu a pha nasa em em mai a. “Aw Lalpa, tunhma lamah te leh i chhiahhlawh hnena thu i rawn sawi hnuah pawh hian mi tawnghmang thiam ka ni ve ngai lo a ni: mi tawng ban leh mi tawngmawh ka ni si a… ni lo ve Lalpa mi dang tir mai rawh,” a ti a. Pathian chu a thin a ur ta a, a hnenah, “ Arona chu mi tawngkam thiam tak a ni a, a ni chuan i thu chu a sawi chhawng zel ang a, Arona chu i tan ka a ni ang a, nang chu Arona tan a Pathian ang i ni ang,” a ti ta a. Mosia pawh chuan phat ngaihna a hre bik ta lo a ni ang, a kal ta a. Mosian Israel fate saltang hruai chhuah a huphurhzia han chhiar hian ava lainatawm em! Hei hian a tarlan chu Pathian mi tirh diktakte chuan huphurh ngawih ngawihin Lalpa rawng hi an lo bawl thin a ni. Loh theih loh an chunga a tlak avang erawh chuan phatsan thei an ni si lo. Tirhkoh Paula pawhin, ‘Tih makmawh ka chungah a tla a ni, ti lo ila ka chung a pik dawn si a,’ a tih reng kha.

           Pathianin Mosia hmangin thil mak ropui takte a ti a. Chung thilmak sawm lai mai te chuan Pharoa thinlung khauh a tinem zo lo. A tawpah erawh chuan fatir thihna Aigupta mite chungah a lo thleng ta a, chu chuan Pharoa thinlung pawh a hneh ta a ni. Israel fate’n an saltanna Aigupta an chhuahsan dawn zan hian chhungtinin beram an talh a, chu beram thisen chu an kawngka biang hmun thumah an tat theuh a, zanah thihna vantirhkohvin a rawn fan lai khan ran thisen tahna apiang chu a kalhlen ta a ni. Hetah hian kan hriat tur pawimawh ber chu: Israel fate tan beram chu Messia a ni. Leilung pianhmaa talh tawh beram no chu a hun tak zelah a rawn inlar thin a ni si a. Chutiang bawkin Pathianin Israel fate tan inthawina thuthlung a pe a. Israel fate tan beram no hmelhem-lo Pathian hmaa an rawn hlan thin chu an tan Messia a lo ni reng si. Hei vang hi alawm Hmangaih Johana pawhin Jordan luiah khan Pathian Fapa chu, “ En teh u, Pathian Beram No, khawvel sual kalpuitu tur saw!”a lo tih ni.

               Mahse ava mak em chhandamtu a lo lang ta,

               Leilung pianhmaa talh tawh Beram No Krista chu.

               Chatuan Pa thinlunga min pek tawh chu a rawn puang ta,

               Ka lo hmu ta, hunbi chelh theih loh ka tlantu chu.

 

            

 

           

 

         

 

 

By | 2013-04-26T18:00:22+00:00 April 26th, 2013|Mizo Article, Uncategorized|0 Comments

About the Author:

Leave A Comment