Pathian Rilru

Pathian Rilru

                         

 NOVA HUNAH TUI A LET TIR. Pathianin a thian Nova hnenah, “Nova, lawng tu rawh, tisa zawng  zawng tawpna chu ka hnen a lo thleng ta,” tiin lawng tu turin a hriattir a. Khawvel pumah tui a lettir  a, Nova te chhungkaw riat chauh an dam ta a, midang zawng zawng chu tui chuan a chimpil ta vek a. He Nova Lawng hian Messia lokal tur chu a lo tarlang kalh a ni. Tawngkam danga kan sawi chuan Lawng chu Messia a ni. Nova, felna thupuangtu a damlai reng pawh khan khawvel mihringte chu an tha chuang lo va, Pathian hmuhnaah chuan khawvel hi a thim mup mup reng a. A thian rinawm Nova a thih hnu ah Pathian thinlung khawhar tak chuan Van atangin Lei lam hi a thlir kual a thlir kual a, a thinlung ang pumi a zawng a zawng thin a, mahse Nova anga thian tur a hmu zo mai lo.

           ABRAHAMA HNENAH THU A THLUNG. Chutiang taka Pathianin Lei lam a thlir thin lai chuan, khaw tereuh te, Ur khua chuan a mit a la ta em em mai. Engvang nge? Chu khuaah chuan Pathian rin ngam, Abrahama a chen vang a ni. Pathian chuan, “ I khaw lam ata leh i laichinho zing ata leh i pa in ata chhuak la, ram ka la entir tur che lamah kal rawh: tichuan chi ropui takah ka siam ang chia, mal pawh ka sawm ang chia, i hming ka ti ropui bawk ang; tin, nang malsawmna ni ang che: tin, nang malsawmsaktu apiang che chu mal ka sawm ang a, anchhe lawhtu che chu anchhia ka lawh ang: nangmahah chuan leia hnam tin an la thawveng ang,” a ti a. Kum 100 dawn lai Abrahama nen hian an inthian hnuah pawh a thutiam tipuitling turin fapa a la pe chuang lo va. Zan thla eng hnuaiah hruai chhuakin Vana arsi a thlirpui te te a, “ Khing vana arsi zat khi i thlahte chu an la ni dawn a ni,” a ti leh mai a. Abrahama nupui Sari thinlungah remruatna fing tak a lo piang a, a bawihnu Hagari pawl tur leh chu Hagari laka lo piang chu Pathian thutiam hlenchhuahna atan tha hle dawnin a hria ani ang, amah Abrahama pawhin chu rawtna chu tha a tihpui ni ngei tur a ni ; a bawihnu chu pawlin a lakah fapa a lo nei ta ngei a, chu chu Ishmaela a ni. Ishmaela a lo pian hnuah Vantirhkohte an lo lang leh a, chung vantirhkohte chuan Sarin fa a pai tur thu an rawn hriattir leh ta. Mihring dana fa hrin theihna an neih tawh loh hnuah a ni Pathianin fa a pek tak chauh ni. Tichuan Sari chuan a tar hnuin fapa duhawm tak, Isaaka a hrinsak ta a, chu ngei chu thutiam fa a ni. Hei hian chiang em em a min zirtir chu mihring lam atanga chhuak reng reng chu Pathian ramah seng luh a nih loh turzia min lo hrilh a ni. Pathian aw a lo ri leh ta, chu aw chuan,“Bawih nu chu a fa nen hnawt chhuak rawh , bawihnu fa chuan bawih lo nu fa chu ro a luah pui dawn si lo,” tih hi. Hei hian Pathian chatuan remruatnaa mihringte lo inrawlh ve a tangkai lohzia a tilang chiang hle.Chu mai a ni hleinem, he Ishmaela lo piang ta avanga vawiin ni thleng a Middle East buaina zozai te tak khu! Sari remruatna avang hian thisen engzat tak chhuak tawh ang maw? Nuclear war hial pawh ala thlen phah lo vang tih tunge sawi thei? Mohammeda te hial an lo pian chhuah phah a ni si a. Pathian rinhlelh chu thil pawi ber a ni a, rinhlelhna avanga mihring remruatna lo piang ve thin hi ava hnawksak thin em! Chu chu tunah pawh ala ni reng tho.

           Ishmaela leh Isaaka chu an inngeih lo va, a piang hmasa Ishmaela chuan a naupang zawk chu a tiduhdah thin. Chuvangin a tawpah phei chuan Ishmaela chu rilru na tak chungin hnawh chhuah a ngai ta anih kha. Ishmaela chuan Sinai tlang dan 10 chu a entir a, Isaaka chuan khawngaihna dan Kristaa lo lang chu a entir a ni. Dan lova felna Krista chu mitin chanvo a nih theih nan Bawihnu leh a fa chu thlalerah Abrahama chuan a hnawt chhuak ngei tur a ni si a. Tichuan thil zawng zawng a fel ta vek em ni? Hnai lo ve. A aia thu runthlak zawk a lo thleng leh ta. Eng thu nge lo thleng ta chu?  “I fapa, i fapa neih chhun, i hmangaih tak, Isaaka ngei kha hruai la, Moria ramah chuan kal la, chutah chuan ka hrilh tur che tlang pakhatah chuan halral thilhlanah hlan rawh,” tih thu hriat nuam lo ber tur chu Abrahama hnenah a lo thleng ta a ni. Abrahama tan hian ava luhaithlak dawn ngai em! Setana hneh let nana Pathian mithlan, Ur khua atanga a koh chhuah, kum 100 chuang lo rinawm tawh thinlung ngei pawh nise, mahni fapa mal neihchhun em halral thilhlana han hlan chu a na dawn em asin! Pathian aw ngei chu a ni si a. Hetah hian Kalvari tlanga Pathian rilru a lo lang a ni. Abrahama, ‘Rinna Pa,’ chuan Pathian kohna angin a fapa chu Moria ram, tlang pakhatah chuan hlan turin a chhiahhlawh te pahnih nen, sabengtung nen an chhuak ta a. Halral thilhlanna tur tlang chu a lo lan veleh a chhiahhlawhte leh sabengtung chu a dintir a, an pafa chauh chuan tlang chu an pan ta a. Tlang an panna kawngah chuan a fapa chu halral thil hlanna tur thing chu a puttir a, a ni chuan chemte leh mei a keng a. A fapa te chuan, “Ka pa, halral thilhlanna tur thing chu a awm a, khawiah nge halral thil hlan tur Beram no chu?” a ti a. Abrahama tan hian chhan ava har dawn em! Hetih lai hian Abrahama hi a a lo chauh ang a, mumal reng a nei lo vang. Hetah hian Pathian rilru a lo lang leh a, Isaaka’n halral thil hlanna tur thing a pu ang bawk hian Pathian Fapa mal neihchhun chuan Kraws rit tak puin Kalvari a pan a, amah khenbehna tur thinganchhedawng ngei chu a pu a ni. “Pathianin halral thil hlan tur beram no chu a ngaihtuah mai ang chu.” A tawng chhuak ve mai mai tawh a ni. Thahrui a nei tawh lo. Abrahama hi a chau ngawih ngawih a ni. Nimahsela a fapa halralna tur thing chunga a zalh der tawh hnu leh thinlung lama a hlan fel veleh a aiah Beram pa thinghnawka lo tang chu hlan atan kawhhmuh a ni ta a. A takah erawh chuan Abrahama hian a fapa hi a hlan fel thlap tawh a ni. Pathianin halral thil hlan atan thutiam fa Isaaka a pe a, chu thutiam fa chu a hlan veleh Abrahama chu mifel a lo ni ta. Chutiang bawkin keini pawh, thutiam fa Krista chu pekin kan awm a, chu thutiam fa chu kalvariah hlan anih veleh khan mifelah Pathianin min lo pawm ve ta a ni. Pathian chuan a thiltum chu tikal zelin Isaaka chuan fapa Jakoba a nei a, chu Jakoba thalbe atang chuan Pathian hnamthlan Israel  a lo piang chhuak ta a ni. Tichuan Abrahama a koh laia a rilru, a hnam thlan bik dinchhuah a lo tumna chu tih hlawhtlin a lo ni ta. Abrahama chungchanga kan hmuhchhuah chu: Abrahama tan Isaaka chu Messia a ni.

 

By | 2013-04-26T18:00:22+00:00 April 26th, 2013|Mizo Article, Uncategorized|0 Comments

About the Author:

Leave A Comment