Pathian Rilru

Pathian Rilru

          PATHIAN FAPA MIHRINGAH A LO CHANG. Mihringte Setana kuta an tluk luh hnu khan anmahni tlan chhuak leh turin Pathianin a Fapa khawvelah a rawn tir ta a. A ni chu mihringah lo changin hmeichhe chhul chhungah nang leh kei ang bawkin a rawn insiam a. Bethlehem khuaa ran thlengah lo piangin Nazaret khuaah a seilian a. Pathian lo relsa diam tawh angin mihring diktak ah a lo chang a ni. Pathian chuan a Pathianna hmanga Setana chu hneh a tum lo va, a thlemthluk tawh mihring pangngai hmanga hnehlet a tum tlat a ni. Chu kawng chu zawh turin Nazaret Isua chu keimahni ang bawkin hmeichhe hrin ngeiin a lo kal a ni. Ani chu natna hremi, lungngai thei leh riltam thei mihring pangngai a ni. Tawngkam danga kan sawi chuan, Isua chu nang leh kei ang tho hi a ni.Ani chuan sual reng reng hre lo ni mahse nang leh kei min tlanchhuak turin sualah siamin a awm. Kum 30 mi anih atangin a mission chu a rawn tan. Eng mission maw? Diabola hneh let tura van indona hautak ber chu rawn hmachhawn turin mawle!

           A  Pathianna hmanga Palestina ram dung leh vang a fan lai chuan, natna tinreng a tidam a. Mitthite kai thovin mipui tamtak a hrai thin a. Mipuiin an zui luih luih reng a, tumkhat phei chu Jerusalemah lalin a lut nghe nghe a ni. Lal Isuan khawvel a fanlaia a thilmak tih anga ropui hi ala thleng ngai lo va, tun thleng hian a thleng leh tawh bawk lo a ni. Nimahsela Getsemani huana an man zan atang erawh chuan a pathianna chu hlihsak a ni ta a. Mihring pangngai a nihna te maiin Diabola chu a tawp rak thlengin a hmachhawn ta ngar ngar a ni. Getsemani huana a tawngtai lai te chuan a lungngai em em a, “Ka pa, he no hian mi pel thei lul lawm ni?” a ti lawm lawm a. A thlan chu thisen hlawm lian tak angin a far hial a. A lungngaihna hi a va namen lo em! Eden huan mawi taka Adama te nupa bumtu khan a chungah rawng takin ro a relsak ang a, nuihza siam nan te a hmang dawn tih a hre lawk vek si a. Chu mai a ni hlei nem, a Pa ngei pawhin a kalsanin a hmelma kutah a pe dawn chu a ni si a. A aia la na daih zawk tur chu a hmangaih, a tuarsakte’n amah chu hre lovin an endawng ang a, an au el ang a, a zirtir thlanchhuahte meuh pawhin an phatsan vek dawn a ni tih hriain, “ Ka pa, he no hian mi pel thei lul lawm ni? Nimahsela keima thu ni lovin nangma thu ni zawk rawhse,” a ti a ni.

           An rawn man ta ngei a. A mantute zawk chuan an hlau ru hle a ni ang, vawilehkhatah an tawlh dual a. Mahse a ni chu a hlauhawm tawh lo, Beram no a hmulmettu hmaa a ngawi reng angin a ngawi reng dawn zawk a ni. A hlauhawm tawh lo, Pathianin a kalsan daih tawh. Haw hawin an chaih luai luai a, mipui an sa hulh hulh a, mita hmuh theih si loh hian Setana chu a nui ruh ruh reng bawk. Puithiam lalber in hungchhung kawtlai thlengin a zirtir pakhat chuan a zui lut ve ngei a, mahse ar vawi khat a khuan hmain vawi thum lai, “Chumi chu ka hre chai lo mai,” tiin a phat hman nia! A mak lo ve, he hmun hi atan a hrang em a ni. Tunge thiltihtheihna nei reng reng tawh lo chu han tan zui ngam tehlul ang ni. Hmusit fahranin puithiam lalber chuan, “Pathian Fapa Messia chu i ni em? Pathian hmingin ka zawt a che,” tiin chang khal hian a han zawt a. Isua chuan chu zawhna chu Eden huana rulpui tar atanga lo chhuak a ni tih a hai hauh lo vang. Mahse hnungtawlh a tum hauh lo, A no in tur chu a pa hnen ata a dawn anih miau avangin a in ngei tur a ni. Tlang takin puithiam lal chu a chhang a. Chu chhanna chuan puithiam lalber chu ava tilawm em! Khenbeh a chak ngawih ngawih chu Rome sipai kutah pe mahse mipuiin an dem dawn tawh lo tih a hria, hekfung tur a nei tha ta em alawm. Judate lal a inti bawk a, lalkawr lem sintirin chibai an han buk el vel a, namen lo hian an bawl a ni.

            Pontia Pilata hmaah an hruai leh a, Pilata chuan, “Chu lal i ni elo?” tiin a zawt a. “ Ni e, lal ka ni asin tih awmawi tak mai zam reng reng lo aw chu hmeiche hrin ka atang ngei chuan a lo ri chhuak a. Rome mite induhzia chu kan hre theuh a, hnamdang reng reng chu an hmusit sa  ngawih ngawih thin a ni si a. A hmaa rawn ding phei hi chu mahni Pathiana inchhal nia an hriat, a chipuite pawhin nung tlak lova an ngaih, Krawsa khenbeh an nghahhlelh ngawih ngawih a ni lehnghal si a; chuvang chuan alawm, “ Chu lal i ni elo?” an tih ngat pek ni. Ani lah chuan, “ Ni e, lal ka ni asin,” a ti ve hmiah mai bawk a ni. Tunah chuan he mi verther Pilata hi a thi daih tawh a, a chhalh hi a hrechiang tawh ngawt ang chu. Lal a ni bawk a, hling ngeia siam lallukhum an khumtir a, thisen far zawih zawihin chu lallukhum chu an khumtir a ni. Ava hrehawm em! Pathian rilru a lo lang a: Mihring fapa hian chu Setana nunrawnna chu a tuar chhuak vek ang a, thih thlenga rinawmin, ngawi rengin a tuar ang. Mihringte’n bawhchhiatna avanga Pathian thinurna an la tuar tur zawng zawng chu a Fapa hian a tuarsak vek ang. Diabola’n duhtawka a sawisak turin mihring fapa hi a pe a ni; Diabola’n a hnuah sawi tur a neih tawh lohna turin.Chutiang taka Adama hnuhnung chuan thim thuneihna lal Setana nunrawnna leh thihna hial chu a hneh hnuah thlan ata a kaitho leh ang a, ropui takin a Fapa chu a chawimawi tawh ang. Eden tlukniah khan lo tap tawh mahse, Fapa hnehna chuan a lung a tiawi takzet dawn a ni. Setana chu zak takin a siam ang a, Hremhmun Meidila kal ve tura a lo bum tawh mihringte chunga a hnathawh chhe tawpkhawk chu hlihkiana awmin a Fapa thisen avangin van khua leh tui nihna a sintir leh dawn tih zawng zawng hi a lo suangtuah lawk diam chu a ni.

           Rome sipaite’n duh duha an nghaisak tura Pilata’n a pek hnu chuan tu mitmei mah ven tur awm tawh hek lo, duhtawkin Nazaret tlangval chu an sawisa ta a ni. A thenin an hnek a, a thenin an vua a, a thenin chil an chhak a. Anchhe tinreng an lawh bawrh bawrh a, a taksaah him lai reng a awm lo. Kraws chu tleitlak zawh loh a hlauh avangin a intipachang hram hram a, a pa lungawina thlen zawh loh chu a hlauh ber a ni. Chuti ni lo se, Kraws a put hmaa a tawrhna ringawt pawh kha mihring han tawrh zawh chi rual a ni lo.

            “I tuarlai hmel ka hmuh hian ka lairil a fan,

             Zan mu reng ka chhing thei lo Kalvari ngaihtuah hian.

              Ka hmangaih Lal Isu i tuarna-a tuar ve turin ka inpe;

              Ka hringnun khengbetin i tuarna Kraws ka rawn pan.”

           Setana nunrawnna rapthlak tak a tuar hnuah Kraws rit tak chu an puttir a, Luruh hmun lam panin an chhawm ta a. Isaaka’n amah halralna tur thing a pu ang khan amah khenbehna tur thing anchhedawng chu puin Kalvari lam an panpui ta. Kraws chu zo lovin a tlukpui hnawk hnawk a, mahse Kalvari chu nang leh kei min tlan nan a put thlen a ngai si; ava manganthlak tak em! Kurini khuaa mi, a hming Simona an hmu a; chu mi chu a Kraws putpui turin an man a (Simona hi ka va han awt tak em!). Kalvari tlang an thlen chuan misual pahnih karah an khengbet ta a. Kraws lerah hian thu 7(pasarih) Lal Isua hian a chhamchhuak a. Chung zinga pahnih chauh chu han thlurbing lawk ila: Pakhat chu, “A kin ta,” tihhi a ni. Enge kin ta chu le? Mihring tluchhe tawhte tlanchhuak tura a lokal na mission chu a hlenchhuak ta a ni. Diabola chu a hneh ta a ni. Eden huana thihna chu a la bo ta a ni. Diabola hnathawh, kan mihringhlui, sualpu taksa, hremhmun aikaih kan nihna chu a tiboral ta a ni ( Hei hi hria ila kan mihringhlui chu a hnenah khenbehin a awm ve ta, sualpu taksa chu tihborala a awm theih nan, tupawh thi tawh chu sual lakah a chhuak tawh si a).Van lam kan thleng thei ta! Lal Davida pawhin, “A tizo tawh tih an la hril ang,” a lo tih kha a ni. Pahnihna ah chuan, “Ka Pathian, ka Pathian engah nge mi kalsan?” tih hi. Zawlnei Isaia chuan, “Pathianin a ni chu vuak thitlin a duh reng a ni, a tina ta ngei a,” a ti. Chuvangin Pathianin Krawsah hian a kalsan a, a cheksawlh a, a tina a ni. Fapa tawrhna namen lo avangin Pa chu a lungngai a, mahse kei leh nangin chatuan nunna kan neih leh theihna turin a hmai leh beng a hup a ni. A tawpah chuan a thlarau a thlah a, a thi ta a. Keini pawh a hnenah kan thi ve ta. A thlan chu namen lovin Temple sipaite’n veng mahse a ni chu thihna chelh hlen rual lohvin thlan ata a lo tho leh ta! Chu thawhlehna thiltihtheihna azarah chuan keini pawh a hnenah kan tho ve ta! AMAH ngei hi au thawm nen, Vantirhkoh chungnungber aw nen, Pathian tawtawrawt rite nen Van atangin a lo chhuk leh ngei ngei dawn a. A tirtea Pathian remruatna angin, a chhungkua chu vanah min hruai chho tawh ang. Josepha fapa chuan a Pathianna tello, a mihrinna ngan hlakin Diabola ngamthlemna chu a hneh a; keini pawh mihring thara din kan nih tawh hnu hi chuan kan mihrinna ngei hian(Thlarau Thianghlim tello pawhin) Diabola ngamthlemna chu kan hneh ve tur a ni.  “Kei pawhin ka hneh a, nangni pawhin in hneh ve tur a ni,” Lal Isuan min ti. He Pathian rilru hi kan hriatfiah lehzual theih nan Pathian Fapa lo lan hmaa he khawvel chhunga Pathian lo inpuan hmasak dan ilo en chiang teh ang:-   

 

By | 2013-04-26T18:00:22+00:00 April 26th, 2013|Mizo Article, Uncategorized|0 Comments

About the Author:

Leave A Comment