Pathianin Lei leh Van leh a chhunga thil awm zawng zawng a din chhuah hnuah, ama nunna tawmpui-a a chhungkua tur leh thilsiam zawng zawng chunga a remruatna leh rorelte hriatpuia a biakrawn atan ama anpui ngeiin mihring a din chhuak a. Pathianin mihring a dinchhuahna rilru zu ngaihtuah hian a ril em em a ni.  A chhungkua tur leh nitina a thiltihte hriapui turin, a thian atan leh a hmangaihna fukthleng atan a ni. A rilru hahna te, a hlimna te, a manganna te, a lawmna te a sawipui thin tur a ni. Vana vantirhkohte leh cherubte, serafte zawng zawng ai-pawha a hlut zawk, ama anpui a siamchhuahna thinlung atangin Pathian rilru kan hre dawn ta a ni. Chu Pathian rilru atang chuan a Fapa hial khawvela a rawn tirhna chhan pawh hi kan hmuchhuak thiam tawh ang.

           Khatia Pathianin mihring ama anpui ngeia a han dinchhuah tak hnu kha chuan a khawhar hnemtu, a thinlung ang pu mi a nei ta a. Tlai nitin, an chenna hmun Eden huanah khan lengin chhungkaw nunbul a tanpui a, an hnenah a chatuan remruatnate la hrilh hman lo mahse, an tana engkim a dah zia te chu a hrilh hman nual tawh a. He lei Planet mawi em em maiah hian a hun tam tak a rawn hman dawn avang leh, an tel lo chuan a khawhar tlat tawh a ni tih pawh an hriat theih turin an chhungkaw inkawm hlimlai te chuan a sawi hman tawh a. Thil pakhat, a mihring siamte chuan hriat makmawh an nei a, chu erawh chu muangchanga hrilh atan a dah rih a ni. Chu chu a hmelma hlun, Diabola chungchang thu a ni. An la hriatthiam mai dawn loh avangin tizawng hian anmahni ven nan a hrilh a, “Lalpa Pathian chuan mihring hnenah chuan, huana thing tinreng rahte hi i duh duhin i ei thei e; a chhia leh a tha hriatna thing rah erawh hi chu i ei tur a ni lo: i ei chuan i ei ni la lain i thi ngei tur a ni,”(Genesis 2:16) tiin.

           Hun rei tak Pathian rorelna lo hriatpui tawh thintu leh Pathian pawhin thurawn a lakna ber thin anih avangin Diabola hi a fing em em a. Pathian pawhin a chawimawi luat avanga lo chapo ta leh a tawpah phei chuan Van ata  paihthlak hial lo tul ta kha a ni reng a. Diabola (Lucifera) finzia tur chu leilunga a thiltih dan atang hian a lang reng mai. Khawvela indona ralthuam rapthlak tawh zia te, mihrngte sualna thuk zia tawh te, khawvel mihring finna tamtakte thleng hian Lucifera hnen atanga an dawn a ni asin! Chung zawng zawng te chu Pathian lalthutphah a thik lai khan a lo zir chhuak vek tawh a ni si a. Chu Setana (Diabola/Lucifera) ngei chu Eden huanah chuan lokalin Pathianin Adama nakruh hmanga a din Evi chu thiam theihtawpin a rawn bum ta a. Evi chuan Pathian pawi a khawih ta! Chu mai a ni hlei nem, Adama ngei pawh chu a kawppui hmeiche hmangin thlemthluk a ni ve leh ta! Pathian ringhlelin Lucifera thu an pawm ta. Enge lo thleng ta le? A chhia leh a tha hriain Pathian ang an lo nih veleh an Pathian anzia a bo ta! Ava rapthlak tak em! Lalpa chu uire sanin Pathian hmelma, Setana lamtang an lo ni ta mai si a. Eden huana hlim taka lo leng thin Pathian ngei chu a chhungkaw dinte chuan an lo phatsan ta si a. An lei hnuk zawng a chat hauh lo, mahse Siamtu Pathian lakah chuan mithi an lo ni ta. Chungnungbera chu a tap vawng vawng a,  “Adam, khawnge i awm tak, thei ei loh tur ka tih kha in lo ei ta a ni maw?” Aw, mihring ka lo din ta chu ka va inchhir tak em! Hmeiche uire-in a pasal thinlung a tihnat aia thuk zawk, fapa mal thihnain nu thinlung a chhunna aia na zawk daih chuan Pathian thinlung chu a chhuntlang ta! Adam khawnge i awm tak!  Kan fa duhlai ngawih ngawih te’n drug ngawl an vei a, biak tlak pawh an ni tawh lo ang hian Pathian chuan Adama chu a hmu ngei awm si a. A hmelma hlun chuan a lo khawihchhe ta vek a ni. “Edena rilru hre reng la, kan Pathian anzia a bo ta!”

           Vanah angel rualten lo hmuak mup mup mahse, Engkimbula chu a hlimchhuak thei hlek lo. A tawpah chuan thinurnain a rawn khat a, “ Nangmah avangin lei hi anchhedawngin  a awm ta,” tih leh  “ Eden huan pawnah a hnawtchhuak ta,” tih thu lungchhiatthlak tak chu kan lo hre ta. Chutichung chuan Pathian chuan a lainat em em a, a hnawhchhuah hmain  Adama tan leh Evi tan chuan savun kawrfual a siamsak a. Hei hian Pathian rilru, ama FAPA ngei ala pek tur chu a lo entir si a. A hmangaihna fukthleng mihringte’n Diabola rawng an han bawl tur leh thim thuneihna Lalin he khawvel mawi tak mai a han awp mup tur hi Pathian chuan a hmu lawk vek a, a tha a na ngawih ngawih a, a hlim thei ngailo a ni. Tichuan Setana kut ata chhuh let leh dan kawng chu a ngaihtuah reng a, Pathian hmalak dan kawng hrang hrang Biblea lo lang chu hetiang hi a ni:-