Helai thu mawi tak mai hi General ropui, Mosian Pathian a karna tawngkam, rilru khawih em em mai a ni. Israel fate chuan Dan la tura Mosia Sinai tlanga a thangbo hlan khan Pathian lakah thilsual rapthlak tak  tiin rangkachak bawng no lem an lo bia anih kha! Chu thil chuan Pathian rilru a tina em em a, tihboral vek a duh hial a. Mahse Mosia ngenna avangin tihboralin an awm ta lo chauh a ni. Hnam luhlul tak an nih avangin Pathianin Kanan pana an kal zelna tur kawngah a  vantirhkoh hruai tir a tiam a, amah tak erawh chuan a ho tawh loh tur thu  Mosia a hrilh a. Chutah tak chuan Mosian, “ Lei chunga mihring zawng zawngte hi kei leh I mite nen kan inthliar hranna tur chuan nang kan hnena I kal thin hi a ni lo vem ni?”(Exodus 33:16) a ti a ni.

 

          Pathian hnamthlan Abrahama thlahte khan hnamdangte aia ropuina an nei bik chuang hauh lo va. A number thuah phei chuan hnam tlemte zawk an ni. Finna thuah nise an aia hnam fing zawk leh thiltithei zawk an tam. Nimahsela an danglamna chu an hnena Pathian a cheng thin kha a ni.

 

          Khawvel historya la thleng ngai lo leh thleng leh tawh ngai bawk lo, mahse Pathian hnam thlan Israelte chunga  thil thleng  chu Mosia hova Tuipuisen an kan kha a ni. Tun thleng hian khawvel hian a awih thei lo va, theologian hote pawhin thil ni theia an hriat loh avangin he khawvel historya thil thleng ngei si hi vawiin thlengin an la chai mup mup reng a ni. Pathian hnam thlan mipui nuai ruk lai mai khan thawk leh khatah Pharoa lalna khawpui, kum 430 zet an lo saltan tawhna kha an han chhuahsan ta kha a ni a. Anmahni mihring chauh kha kalchhuak ta ni se zawng thu hran, a ni lo va, an ran rual zawng zawng te, an rosum leh ei tur tinreng nen an kal chhuak a ni. Tunlai angin lirthei a la awm bawk si lo. An kalna tur kawng lah chu thlaler ram ro tui awm lohna leh ei tur ilo fahran pawh awm lohna a ni.

 

          TUIPUI SEN A KANGCHAT. Chutianga nunau nen, bawngbawra an han chhuak ta mup mup mai chu, kha leh chen sala lo chhawr tawhtu Pharoa thinlung chuan a ui leh hnuhnawh a ni ngei ang; a sipai rual nen, a sakawr tawlailir rual nen lakkir leh emaw tihboral vek tumin emaw a um leh ta chiam mai kha a ni a. Anni Israel ho lah chu Tuipuisen kamah an lo la inawi leih leih chauh mai si a.  Hnunglam an han hawikir a, Pharoa sakawr-tawlailir tlan ri hum hum thawm an han hriat chuan namen lo hian an hlau a, anmahni hruai chhuaktu Mosia chu lunga denhlum tak an nap a ni.  “Mosi, Aigupta ramah khan thlan a awm loh vang em ni helai thlaler hmuna thi tur hoian min hruai chhuah,” an ti a ni. An demawm lo ve. An hnunglamah Pharoa sipai an ther fur tawh mai si, hmalam an han en a, Tuipuisen a tling cham po mai bawk si a.  Ava manganthlak dawn em! Chutih lai tak chuan Israelte danglamna chu a lo lang ta! An hnena Pathian cheng chu. Mosian Tuipui chunga a tiang a han lek veleh chu tuipui chu a lo kangchat a, leicharah Pathian hnamthlan chu an kalkai ta a ni. Chutiang bawkin keini Lalpa thlante pawh kan danglamna awmchhun chu kan hnena cheng Messia Krista hi a ni e!

 

          JORDAN LUI AN DAI KAI. Mosia hruaina chu Jordan lui an kan hma khan a tawp a, a aiawhtu atana Pathian ruat, Joshua hnenah charge a hlan ta a. Charge an inhlan hnua Pathian aw danglam tak lo ri chhuak ta chu, “ Mosia hnena ka awm ang khan i hnenah pawh ka awm dawn a ni,” tih hi a ni. Joshua hnenah khan Pathian awm lo ta se, Jordan lui an daikai thei lovang. Israelte an ropui a ni lo va, an tha bik pawh a ni lo va, thil an ti thei bik a ni hek lo. An danglamna chu an hnena cheng Pathian nung kha a ni. Keini thlante pawh hi kan that bik vanga danglam kan ni lo va, kan danglamna chu kan hnena lei leh van siamtu a cheng tlat hi a ni!

 

          KAN DANGLAMNA CHU BERAM NO THISEN A NI. Sakawlh lalram lo ding tur Pathianin a huat em emna chhan chu lei mihring, Krista thisena tlan tawh zawng zawngte Pathian hmelmaa kan tang tur hi a ni. Diabola chuan  Lal Isua lokal lehna niah hian Krista hmuaktu tur awm lek lova a lamtanga lei mihring zawng zawngte lo siam hi a ni a. A thiltum a tih puitlin theih hlauh chuan Krista lokal lehna niah Pathian Fapa chu zak takin a siam thei dawn a ni. Tunah hian khawvel kohhrante chu Setana hian a lamtangah a siam teuh tawh a; hnehtute (thlante) chauh hi a hneh theih loh chu an ni. Engvanga hneh thei lo nge a nih ? Beram No thisen avang leh an hriattirna thu avangin a ni chu an hneh a ni, thih ngam khawpin an nunna an ngainep bawk a, tih hi a ni (Thupuan 12:11). Tunlai hian Pathian hriattirna thu puang chhuaktu tam tak an awm. Chung mite chuan an mahniin chung hrittirna chu an dawng emaw, an khar chhawng emaw pawh a ni thei e; nimahsela anni nena kan danglamna chu Bram No thisena chhinchhiah kan nihna hi a ni.

 

          DAVIDA HNENAH PATHIAN A AWM. Tumkhat chu Israel sipai rual leh Philistia sipai rual indo turin ruamah an inep a. Philistia sipai chak tak, Goliatha avangin Israel sipai chu an zam chhe zo vek mai a. Amah bei ngam reng an awm lo. Chutih lai chuan Israel ho zingah tlairawl danglam tak Davida an tih chu a awm a, ani chu sipai pawh ni lo, beram vengtu mai mah nise chu Goliatha chu beih a chak et et mai a. An inbei ta nge nge reng a. An dinhmun inthlau hle mahse Davida chuan chu Philistia sipai rapthlak tak mai chu hnehin a lu a laksak  a ni! Engvang nge? Davida hnenah Pathian a awm tlat vang a ni. Keini pawhin kan raldote kan hneh dawn! Engvangin? Lalpa sipaihote Lalpa chu kan hnenah a awm avang hian.

 

          ELIJAN BAAL PUITHIAMTE A TLAWM. Israel lal Ahaba hunlaiin maicham inhalsiakna ropui tak, Baal puithiamte leh Zawlnei Elijan an nei a. Zawlnei Elijan hnehna ropui tak changin Baal puithiamte chu a tihlum zo ta anih kha. He hnehna ropuitak hi Elija tih a ni lo, Zawlnei Elija hnena awm, Israelte Pathian tih a ni zawk. Tunah hian kan ramah ngei maicham inhalsiakna kan nei mek a, kan lal hmingin kan hneh zel dawn a ni.

           A tawp  berah chuan, an kraws thu sawi leh kan kraws thusawi a danglam. Anni chuan mihringte tlan nan Kalvari tlang thinganchhedawng krawsah Isua Krista chu khenbehin a awm a, a thih hnuin Josefa thlan ruakah zalhin a awm leh a. A tuk thum tukah thihna hneh zovin thlan ata a tho leh a ni.  “Chu Krista chu  Lal leh Chhandamtu ah pawm la, i piangthar a ni mai,” an ti. Keini erawh chuan: Pathian Fapa an khenbehna thinganchhedawng krawsah khan kei leh nang zawk hi kan thi a, Josefa thlan ruakah zalhin kan awm a, thlan ata thihna hneh zovin Krista ah kaih thawhin kan awm.  “Chu kraws tlanna azarah chuan keini ni lovin, amah zawkin a fa duhtakah min pawm a ni,” kan ti.

 

          RORELNA. Mi zawng zawng chungah Pathianin mi pahnih hmangin ro a rel tih Bibleah chiang takin kan hmu a. Adama hmangin ro a rel hmasa a. Chu Adama hmanga ro min relsakna ah chuan Adama bawhchhiatna avangin mi zawng zawng hi anchhedawng kan ni. Hei hi thu a ni mai lo. A dik ngei a ni tih a lo lang a, naupang te thinlungah pawh itsikna, elrelna, mahni hmasialna a lo lang thin. Chutiang chu kan zain kan ni vek a ni. Hei chiah hi alawm, Bible thianghlima kan hmuh, “Adama anga bawhchhe lotu chungah pawh thihna chuan ro a rel,” a  lo tih kalh ni! Chuiang bawkin mi pakhat Isua Krista hmangin ro min relsak leh a. Chu Kristaa ro min relsakna ah thung chuan, thing anchhedawng Krawsah kan mihring hlui, Adama hnen atanga kan dawn chu khenbehin a awm a, a thih hnuah thlana zalh a ni a; chu thlan atang vek chuan nunna thar neiin Krista ruala kaih thawh kan lo ni. Hei pawh hi a dikna a lo lang leh a, chu thutak chu mi’n a hriat veleh amahah Krista nunna zia a lo awm tih leh chu Kraws zarah chuan tisa chu a sual ngaihtuahna leh a chaknate chawpa khenbeh theihna a lo nei ta a ni. He Pathianin mihringte min din thar lehna hi amah Pathian lamah chuan famkim nghal vek mah sela keini mihringte lamah thung chuan nitina thang lian  chho deuh deuh tur a ni thung.