Mizoram Governor in Solomona Temple a tlawh

//Mizoram Governor in Solomona Temple a tlawh

Mizoram Governor in Solomona Temple a tlawh

Aizawl Dt. 23.12.2017 (Inrinni): Vawiin ni khan Mizoram Governor Lt. Gen. Nirbhay Sharma (Rtd.) leh a nupui ten Solomona Temple an tlawh. Kohhran Thianghlim rorelna sâng ber, Executive Committee Chairman, Dr. L.B. Sailo leh a member pui ten an lo dawng sawng a. Governor leh a thiannu hian group hrang hrang thil cheimawite an fan kual bakah, Temple chhûng leh a velte ngun takin an en a ni.

            Kuminah hian group hrang hrang 15 ten theme hrang hrang siamin, an thil cheimawite an pho chhuak a, heng cheimawite hi October thla-a an neih, Coronation Day–2017 denchhena an buatsaih a ni. Solomona Temple hi ni 25.12.2017 hian a hawnna hun ropui taka neih a ni dawn a, hemi pual hian christmas theme a cheimawi chhunzawm leh a ni.

            Governor hian, “Mizo mipui zawng zawngte christmas leh kumthar chibai kan bûk a che u. Mizo mipuite hi kan ngaina a, in zinga awm hi nuam kan ti a. Kohhran inrelbawlna felfai tak nena Temple-a thil inbuatsaih hian min ti lawm hle a. Inhmangaihna, inlungrualna leh dawhtheihna hian Mizo society hi a ti nuam a, hei hi khawvel pawhin tun huna a mamawh ber chu a ni. Sakhua, chi leh hnam bil awm loa inlungrualna hian hmasawnna nasa tak a thlen thei a ni,” a ti.

            Mrs. Jyotsna Sharma pawhin, “Christmas leh kumthar hmang tura ka rawn haw chho leh thei hi ka lawm hle a, Mizo mipui zawng zawngte he hunah hian chibai ka buk a che u. Piang nawn leh thei ni ila, Mizoram ngeia pian hi ka duhthusam a ni,” tiin a sawi bawk.

By | 2017-12-23T18:24:24+00:00 December 23rd, 2017|Uncategorized|Comments Off on Mizoram Governor in Solomona Temple a tlawh

About the Author: