Meialh leh Chhum dingin min hruai ang che

/, Uncategorized/Meialh leh Chhum dingin min hruai ang che

Meialh leh Chhum dingin min hruai ang che

MEI ALH DING LEH CHHUM DINGIN

MIN HRUAI ANG CHE”

Lalthanga Champhai Kahrawt

 

Aizawl 5th July  2013 ( Fri ) : Tin, Juda chuan, “Thawktute tha a chau zo tawh a, bawlhhlawh lah a nasa si a, KULH CHU KAN SIAM THEI DAWN TA LO ANIH HI,” a ti a.  (Nehemia 4:10)

          Kulh siamtute zinga mi Juda hi a beidawng ve hle mai. Kulh chhung bawlhhlawh nasat zia a hmuhin leh thawkute chau hmel a hmuh khan, “Kulh chu kan siam thei dawn ta lo a nih hi,” a ti thlawt mai. A ni taka, kan bawlhhlawh tawhzia han en hi chuan thenfai leh tihthianghlim hi a huphurhawm ngawih ngawih a ni. Lalpa mi hman leh mi thahnemngaiten thawk rim hle mahsela, Juda ang mai hian thinlung kil khatah hian beidawng hi a awm tlat a. Hman kan ang thei tak tak tawh lo ang, kan ti rilru tlat thin. Mimal nunah pawh engmah ka ni leh chuang lo ang kan ti tlat mai.

          Tunah pawh thalaite Lalpan a rawn kai tho a, Jerusalem Kulh tundin lehna hna chu rim takin an bei a, ropui pawh kan ti. Nimahsela,  kulh chhung bawlhhhlawh nasat zia kan han thlir hian Krista taksa Kohhran Thianghlim hi Lalpan thawhlehnaa min hruai lai ni ang kha thleng zo chuang dawnin kan inhre tlat lo. Hawh u, i din teh tak ang u tih ai chuan kan ral thlir a, engchen tak daih ang maw ti ni awm fahran hian a lum tawkah kan lo ai ve mai mai ni te hian ka hre thin. Nehemia thlarau chuan lemchanna tel hauh loin mimal tin, chhungtin te a kulh chhe tawh chu din thar lehin bawlhhlawhte chu a rawn thianfai ta duak duak mai a. Kan va vannei tak em! A then ruihhlo bawia tangte, khawvel nawmsip bawlnaa tangte min silfaiin min tithianghlim ta si a. Thlaraua beidawng tawhte, sual vanga lungngai tawhte zawng zawng hnenah beiseina nung hmu leh tura min hring leh tu hi fak tlak zawng a lo ni e.

          Meialh ding leh chhum dingin min hruai leh ta zawng a nih hi. Meialh ding hi enge ni kan tih chuan Krista Lalna (Indona thianghlim) a ni. Chhumding hi enge ni kan tih chuan THLANTE KALVARI a ni. Tunlai ka tawngtaina hla chu, ‘Chhumding eng, hma hruai zel rawh,’ tih hi a ni. Ka thlarau a chauh dawn apiang hian Krista tawrhna hi ka han en leh thin a, chu chuan tuihalna min pe leh thin. Krista \anna thar min siam leh thin. Ziona min an duh loh  kha, ‘Ka Tlantu,’ tiin ka ko lo thei lo. Mosia kha Israel te tlantua lo kal a ni ang khan, khawvel miten an duh loh an hnawhchhuah thin, zan mu thei lo a lungngai mangang thin kha, zofate hian hnawl mahse, kei ka tan chuan ka tlanna Kalvari a ni tlat mai. He mi hi a ni, tui leh thisena lo kal a chu. Tui chuan sual silfaina a kawk a, thisen chuan tlanna a rawn kawk bawk. “Tuiah chauh ni lo in,” a tih kher pawh hi a mak leh zel ti raw(h) ! Tui leh thisen a ni tlat mai. Amahah kan tlanna kan hmu  ati ringawt lo a, kan sualte ngaihdamna chu, a ti leh kher a ni. Chu Thlante Kalvari chu Lalpan min han hmuhtir chuan tlanna leh sual tlenfaina lui hi a lo luang her her mai nia. Chu’ng thil ropui tak mai, nang leh keiin kan chan theihna chu,  a Chhiahhlawh hian hrehawmna nasa tak leh lungngaihna reh thei lo nen a hlen chhuah vang a lo ni. Mosia khan hmuhtheihloha chu a hmu a; a tuar fan fan a, Israel te a phurchhuak ang khan.

          Chutiang taka miten an hnawl, mi lungngaia chu, a tawrhnate tawmpui a, tahna mittui sen ve piah lamah, amah \an thar lehna meialh hian min hliau ve ta zuai zuai mai hi thil mak tak chu a va ni em!

          Tawkfang sa hauh lo a, thim thuneihna in thlante min han luhchilh hi amah kan Lalpa hmangaih tawhtu tan chuan alh zuai zuai mai pawh hi thil harsa tak a ni. Juda chu beidawng hle mahse, Nehemia’n ralvengtute a dah a, leh lamin hna an thawk a, lehlamin hriamhrei (ralthuam) an ken chinah chuan kulh siamtute chu tuman an tibuai ta lo a. Hna chu thawh zawh a lo ni ta.

“Meialh ding leh chhum dingin min hruai ang che.”

By | 2013-07-05T17:36:37+00:00 July 5th, 2013|News, Uncategorized|0 Comments

About the Author:

Leave A Comment