Hun kal liam tawh  thlir let chu tangkai lo hle mahse, a tangkai lohzia sawitute pawh hian thlir let chang an neih thin avanga sawi an ni ve bawk ang. Chu bakah tunlai thangtharte tan hian hlutna riau awm dawna ka hriat avang leh thangtharte thlarau nun khawngaihthlakzia  han hmuh hian engemawti kawng tala thlarau hahchawlhna an chhar chhuah phah hlauh tak dahin  ka ti a ni.

             Tun ang hian chhungkaw nun, khawtlang nun leh hnam pumpui nun ala changkang lo va. Zirna in te chu khawtinah ding ve thlih  tawh mahse lehkha thiam aiin thiam lo kan la tam zawk a. Mipui nawlpuiin hlo an thlovin thingtlangah phei chuan dawr (shop) hmuh tur pawh ala awm meuh lova. Aizawl ah thleng pawh hian lirthei ala tlem em em a, thingtlangah phei chuan tawlailir bak kan chuang ngai lo.

             Thangthar te u, chung hun lai chuan kan ram leh hnam nun hi a nuam em em a, kan khawtlang nun hi khawvelah a nuam ber hial ang.Inhuatna te, initsikna te, mahni hmasialna te hian kan thinlungah hmun a chang ngai lo va. Kan ram leh hnama missionary te’n an rawn thlen, Krista chanchin tha chuan kan khawtlang nun pumpui hi a neih vek avangin kawngkawiah kohhran upa tawk dawn ila  anmahni kan ngaihsan em avangin kan zah a, hel dan ngawt kan zawng thin. Skul lama kan zirtirtute nise kan zah em em a, dawt sawi thei hian kan ring  ngai lo va, kan nu leh pa te ai pawhin kan ring zawk hial thin. Pastorte ngat phei chu vantirhkoh ang hialin kan thinlung hian a hmuak thin a, an hmelah hmangaihna chhimbal ang a zam a, anmahni pawh thlarau lainatnain an khat tlat thin a ni. Tumkhat chu kan inah Pathian thu hriltu pakhat hi a lo thleng a, ka ute nen kan khum pindanna dap awng atangin kan bih kan bih mai a, a hmel hi eng set hian kan hmu nia. Chung hun lai chuan kan eng neihchhun chu far chhit-en a ni mai a, kan mikhual chu a en hian kan en tlawk tlawk mai a ni.