KOHHRAN THIANGHLIM DINTU DR. L.B. SAILO CHANCHIN

????????????????????????????????????

Thlarau Thianghlimin Kohhran Thianghlim a dinna hmanrua, Dr. L.B Sailo chu kum 1952 ah Hnahlan khuaah a piang a. A pa chu Hnahlan lal, Vanlalnghina Sailo a ni. He khuaah hian Primary School leh Middle School a kal a. A naupan lai hian Lal Isua, Kraws-a an khengbet lai a hmu a, Pathianah a lawm em em a. A zirna ah pawh Scholarship leh General Proficiency Scholarship te a hmu a, chungte chu Krista Kros hnathawh vek niin a hria a, ‘Lalpa i ropui nân ka hlan a che’, ati thin ani.

           High school leh College chu Shillongah a zir a. Kum 1974 ah Pi Lalzirliani nen an innei a, fanu 2 leh fapa 2 an nei a. Kum 1974-ah BVSc & A.H. zir turin Guwahati ah a kal a. Hetah hian a thianpa Dr. Kipp Rio Angami nen Teenager Evangelism of Nagaland, magazine an siam a, an hlawhtling viau a, tunah chuan Teenager Evangelism of Nations tia thlakin, khawvel pumah an thawn chhuak tawh a ni. Tin, Guwahati ah hian zirlaite in pawl khawmna, English Service an din thar bawk.
Dr.L.B. Sailo hi Pathian zawng mi leh tih mi tak ani a, rinawmna leh thianghlimna hi a thupui ber ani. Kum 1978 ah, Mizoram Sorkar hnuaia Vety Asst. Surgeon hna a thawk tan a, Sorkar hna a thawh hnu pawh hian a duh ber chu Missionary a kal ani.
Sorkar duhsakna zarah training chi hrang hrang a kal tawh a, chungte chu:-

 
1.Deep Frozen Semen Technology (Mathupathy, Kerela)
2.Animal Health Extension (Nilokheri, Haryana)
3.National Diploma in Animal Reproduction (IVIR, Uttar Pradesh)
4. Gender in Rural Development (Guwahati)

          
          Kum 1979 kuma Deep Frozen Semen Technology training tura a kal lai hian thil mak tak a tawng a. Calcutta to Madras pana Boeing-a an chuan laiin, Cyclone na takin a nuai thut a, an thlaphang hle mai a. Chutih lai chuan a thinlungah, “Biakmawi, i thi tawha, i nunna chu Krista hnenah thuhrukin a awm tawh e”, tih thu a lo thleng a, a thla a muang ta a, a lawm ta em em mai a. A bula thute hnenah, “Be peaceful”, a han ti a. Anni chuan, “Nonsense”, an ti a, reilote ah Cyclone chu a reh ta a. A chuan pui ten mak an ti hle mai a. Heta tang hian Pathian thu hi zir chi ani lova, hriattirna alo ni reng tih a hre chhuak a, Paula Testimony behchhana alo sermon thin kha, a chanvo alo ni ta a.

           Kum 1982 ah Mizoram Synod chuan Corruption do a puang a, Bungkawn Pastor bialin Speaker ah an hmang a, a rawngbawlna a nung hle mai a. Corruption do programme zawh hian thlaraua thawhlehna thu a sawi leh a. Zoram mipuiin an duh a, an tuipui em em laiin, “ Krista Kross ah Lal Isua a thi love, Kross ah chuan anchhedawng kan thi zawk ani,” tia a thusawi chu Pastor ten an duh lova, an hnawl ta a. Krista Kross rit tak mai chu a phur ta a, tihduhdahna te, hmuhsitna te phurin Aizawl veng hrang hrangah, chenna tur hrelo khawpin an siam a. Krista avanga a tuarna tam tak te chu Pathianin a hre reng a, thih hlauhawm lakah pawh a hum him zel thina. Heta tang hian Pathianin (Dr. L.B. Sailo kaltlangin) Holy Church hi a rawn din ta ani. Pathianin in tha tak ape a, tunah chuan ama inah thlamuang takin a nupui fanaute nen an cheng ani.


Dr. LB Sailo chuan kum 1985 ah, “Mizoramah hian Solomona Temple a la ding ang,” tiin a sawi a. Tunah hian hmuh theihin Solomona Temple chu Kidron Valley, Chawlhhmun, Aizawl, Mizoram, India ramah alo ding ta ani. Sak zawh ala ni lova, mahse Visitor tam tak leh Tourist tam tak a en turin an lo kal thin ani.