INNEIHNA (INNEIHNA THIANGHLIM)

Zoram Kohhran dangte chuan ‘Kohhran Dan Thianghlim’ an ti a, Kohhran Thianghlimah chuan INNEIHNA THIANGHLIM tih a ni thung. Zoram kohhran hrang hrang te chuan KRISTIAN CHHUNGKUA an ti a, Kohhran Thianghlimah chuan KRISTA LUAH CHHUNGKUA din turin tih a ni. Kohhran Thianghlima Inneihna Thianghlim chu:

  1. Krista luah chhungkua din turin.
  2. Kohhran leh Krista inpumkhatna entirna a ni.
  3. Inneihna Thianghlim chu dam chhunga kross pu dun tur, Lalpa leh kohhrante hriatpuina a nupa-a insiam hi a ni.
  4. Inneih hma a taksa innelna leh mipat/hmeichhiatna hmang miah lo.
  5. Thlarau thianghlim neitu ve ve an ni tur a ni.
  6. Nupa inthenna a awm ve thiang lova, muthilhna chauh lo chuan engmahin a then thei lo.

 

Pathianin mihringte hi hmeichhiaah leh mipaah min siam a (Gen 1:27). Chi tamtak thlaha lo punga leilung hi luahkhat turin min siam a ni. Hei hi tun thlengin a la ngai reng a. Pathianin a ngaih pawimawh zia a lanna chu, Lal Isuan thilmak a tihna hmasa ber pawh Kana khua inneihna a Uain a tihpun kha a ni. (Joh 2:7-11)

 

Inneihna Thianghlim chu Thlarau Thianghlim neitu ve ve, Krista luah chhungkua din tur leh dam chhunga Lal Isua kross pu dun tura nupa a pumkhata insiam dun a Lalpa mithmuhah leh kohhranho hriatpuina a inneihna hi a ni.

 

Hei hi a thianghlimin a ropuia, a zahawm a, chawimawi tlak a ni reng a ni. “Mi zawng zawng zingah inneih hi chawimawi in awm sela” Heb 13:4

 

Tirhkoh Puala chuan inneihna chungchang a sawi zelna ah chuan “Hei hi thuril thuk tak a ni; Krista leh a kohhran thu kei chuan a sawina niin ka hria”, Ephesi 5:32 ah chuan a ti a. Bible-ah hian inneihna chungchang kan hmu nasa em em a, a tum tak erawh chu Krista leh kohhran (a taksa) chungchang min hriat chiantirna tura Pathian chatuan remruatna a lo ni reng. Kohhran thenkhatah chuan dan khatna leh dan hnihna te a awm a, Kohhran Thianghlimah chuan Inneihna Thianghlim chauh a awm. Nupa inkarah hmeichhe chhungte leh nu leh pa tumah an tlazep thiang lo. Chutiang bawkin, Krista leh a kohhran inkarah engmah a tlazep thiang hek lo. Nupa inpumkhatna leh inhmangaihna chu a chungnung ber tur a ni. Hetiang bawk hian Krista leh a kohhran inkarah hian khawvel finna leh ropuina te, sanna te, thukna te engmah a tlazep thiang lo.

 

Nupui chu a pasal tan a invawng thianghlim reng tur a ni a, pasal pawh a nupui tan a invawng thianghlim reng tur a ni. Chutiang bawkin kohhran pawh a pasal Krista tan a invawng thianghlim tlat tur a ni. Lu ber Krista thuneihna hnuaiah chauh a awm tur a ni.

 

Mi tupawh Inneihna Thianghlimah Lalpan a suihfinna niah hian kohhran leh Krista kan inneih thar lehna ni atan Lalpan mal a sawm thin a, Thlarau Thianghlim neilote hnenah Thlarau Thianghlim peka an awmna ni ah(Uain tihpunna ni ah) Lalpan min hmansak thin hi Inneihna Thianghlim ropuina em em chu a ni. Sawi vek sen a ni lo, heta kan sawi ang hi Kohhran Thianghlim te inneihna chungchanga Lalpan min hruai dan tlangpui chu a ni. Man leh mual chungchangah chuan Lalpa thlante chu Lal Isua thisena lei leh a hrinte kan ni a, kan man chu Lal Isua thisen chauh hi a ni. Tangka, rangkachak, lunghlu leh thil man tam chi hrang hrang pawh a lei ve theih kan ni lo. Kan man hi a tam em avangin man leh mual kan nei ve thei lova, innei tura pawimawh ber leh pumkhata damchhunga awm nghehtir theitu chu hmangaihna, thianghlimna leh rinawmna rohlu ber chauh hi a ni e.

 

“Chuvangin Pathianin a zawm tawh chu mihringin then suh se.” Mt. 19:6