IN THIANGHLIM TUR A NI – Msry. Laldawnkima

          Bible kan chhiar chuan, “Thil tha ti atân Krista-ah chuan siama awmin, Ama kutchhuak kan ni si a” tih Tirhkoh Paula chuan a lo sawi a. Pathianin atâna hmanraw tangkai leh Ama chenna tura a lo buatsaih, a kohchhuah, Bible thianghlima kan chhiar mi lar tak tak: Mosia te; Abrahama te; Lal Davida te; Joshua te zawng zawngah hian amah Pathian chu thianghlimna a khat a ni tih intarlangin, thianghlimna a duh hmasa ber thin a ni.

          Pathianin Israel fate hruaichhuak turin Mosia a kova, a Beram venna ah thingbuk alh hluah hluah atangin Pathian chuan a ko a ni. Mosia’n chu ‘AW’ chu a hriat chuan thingthiin a kai kun a. Pathian chuan, “Mosi, Mosi, i awmna kha lei thianghlim a ni, i pheikhawk kha phelh rawh” tiin a zuk ko a ni tih kan hmu a. Engnge a awmzia kan tih chuan atân hmanraw tangkai tura a kohte reng rengah chuan, amah chu thinnel tak, lainatna a khat, dawhthei tak leh mi khawngaih thei tak nimahsela, a mitea a inlarna hmasa berah chuan thianghlimna hian bul a tan chat chat zel a ni. A awmzia chu, Pathian a hmangaihna te, khawngaihna te leh dawhtheihna te chu kan hriat loh hlau em em mahse, chung zawng zawng chu kan dawn theihna tur leh amah chu kan tih theihna turin, mi kanral hmang mei angin a inlar hmasa thin a ni.

Chuvangin, thianghlimna hi i chawisâng reng ang u. Thianghlimna lovin tumahin Pa hmel an hmu lovang. Unaute u, Josefa ngei pawh kha, Chungnungbera Pathian lakah a inserh thianghlim avang leh hmeichhe lakah pawh a intihbawlhhlawh loh avangin Pathianin ropui takin a chawisâng a ni. Lal Isua lokal leh nî thlengin thianghlimna hian i inthuam reng ang u. Bible thianghlim chuan khauh takin “In thianghlim tur a ni, kei ka thianghlim si a” a ti rup mai a ni. Thianghlimna hi khawiah nge kan neih theih a, khawiah nge a awm tih hi ka thinlungah hian a lo kal lian em em a ni.

Khawvelah hian sakhaw tam tak a lo awm tawh a, Hindu hote chuan Ganges lui hi thianghlimah ngaiin an inbual sup sup thin a. Sual tlengfai theiah an ngai a ni. Nimahsela, Pathianin Eden huan ata bawhchhiatna atanga a hnawhchhuah  tâk, nang leh kei, he Adama thlah hian thianghlimna reng reng kan nei lova. Bawhchhiatna vanga Setana kan lo zawm tawh avangin kan thatna lai ber pawh hi pawnchhe hnangkhai ai pawhin a chhe zâwk a. Thi tura rorel sak kan ni a, kan thinlung ngei pawh hian thlamuan duh thin mahse, thlamuanna kawng pawh kan hre lo a ni.

Chuvangin, Zoramah pawh zirtirna tam tak lo zichhuakin, Lal Isua chu Lal leh Chhandamtu a ni tih ring mai rawh, Lal leh Chhandamtua i pawm chuan chhandam i ni mai, tiin an inzirtir thin. A ni, kan han pawm a, kan han rin ve leh khan chhandam niin kan inhre ringawt a. Nimahsela, he mihring atanga chhuak reng reng hi Pathianin a duhlo mai nilovin, a pawm thei lova ni. Chuvangin, nang leh keia Pathian hmel hmuh theihna awmchhun chu thianghlimna atang chauh a ni. Khawiah nge a awm kan tih chuan, Pathianin a fapa, Van Angel leh Serafimten “A thianghlim e, a thianghlim e” tia an chawimawi nin loh, nang leh kei anchhedawng chan tur, he leia lo piang a, Kalvari tlanga khenbehna Kraws-ah khan kan thianghlimna chu a awm a ni.

Engtin nge chutah chuan a lo awm? Lei mihringte hmuh danah chuan Lal Isua an khengbet in an hria a. Nimahsela, Pathian fapa Kalvari tlanga an khenbeh kha Pathian hriatna ah chuan nang leh kei anchhedawng, bawlhhlawhna a khat ngei hi khenbehin kan awm zawk a ni. A va mak em! Krista Kraws-ah nang leh kei hi Pathianin min khengbetin, thawhlehna thianghlimah min kaitho leh ta a, chu min kaihthawhna chu a ni, Tirhkoh Paula ten, “Krista hnenah khenbehin ka awm ta” tia an lo auchhuah pui ni. Tirhkoh Paula-te chauh ni lovin, nang leh keia chanvo tura Lalpa buatsaih a ni e.

          Kristianna hian Bible hi a zir thin a, Korinth khua a Paula lehkhathawnte, Rom lehkhathawnte a zir thin a. Nimahsela, Bible thianghlim hi zirtirna (teaching) ni lovin, hriattirna (information) zâwk a ni. Entîrna lo sawi ta ila, hetah Aizawlah ka awm ta a, Lungleia ka nu leh pate chu natna avangin an lo boral hlauh mai a, zualko an lo tlan vang vang a. Ka nu thihthu min rawn hrilh a, keiin a thi tih ka lo pawm ve ngai tawh lovin, ka awi tawp mai tur a ni. Chutiang chuan nang leh kei hi Pathian mithmuhah chuan anchhedawng, sualna a khat, bawlhhlawhna a khat, damlai reng reng awm lo, vuak duk chur ang mai, kan thatna lai ber pawh pawnchhe hnangkhai ang a ni.  Anchhedawng chu nangmah ngei kha i ni a, eng ang pawhin tha inti la, fel viauin inhre mah la, zu pawh in ngai lo, drugs pawh ti ngai lo, nula pawh ngai ngai lovin inhre mah la, i thatna lai ber pawh kha Pathian mithmuhah chuan pawnchhe hnangkhai ang lek a ni. Chuvangin, he mihring ngei mai hi Pathianin thi tura a ruat angin mitthi kan ni tawp mai a ni.

Nimahsela, Lalpa lei leh van siamtu chuan thihna in ro min relsak tawh mahse, a hmangaihna chuan a fapa, nang leh keia anchhia phur turin he lei tlawm takah a rawn tir ta a ni. Unaute u, kan Lalpa Isua Krista lokal chhan ber chu Diabola hnathawh tihboral a ni. Mihring thinlungah Setana’n hmun a neih tawh avangin, chu a hnathawhte tiboral turin  Pathianin a rawn tir a ni. A ni, a tihtur a tleitlâk dawn chuan “Ka pa, he No hian min pel thei lul lawm ni”? tiin lungngaia rumin a tawngtai a, a thlan thisenin a far zawih zawih a ni. Juda leh Rome mipui ten “Kraws-ah khengbet rawh, Kraws-ah khengbet rawh” tiin Nazareth Isua Pathian fapa ngei mai chu an au lui lui a. Nimahsela, Pilata chuan engtinnge a tih, “An hekna zozai che kha i chhang dawn nang e?” a ti a. A ni, Juda ten an hêkna leh an au khumna zawng zawng kha nang lei keia anchhia anih tlat avangin a tawng thei miah lo a ni. A ma chungchangah “Chu Lal i ni e lo? a tih khan, “Ni e, Lal ka ni asin” a ti a ni. A ma chungchangah chuan a tawng thei a, nang leh keia chungchangah chuan a tawng thei lo a ni.

          Lal Isua chu anchhedawng hringfa zawng zawngte aia khenbeh turin he leiah hun reilote a hmang a, Kraws rit tak amah an khenbehna tur chu pu in Kalvari tlang an panpui ta a. Pathianin a fapa a rawn tirh chhan chu a tleitlâk ta a ni. Chu a tleitlâkna chuan engtin nge a tih kan tih chuan, a hnukchah dawn khan, “A kin ta” a ti a, a thlarau a thlah ta tih kan hmu a ni. “A kin ta” a tih khan, Pathian hmuhnaah/hriatnaah chuan nang leh kei anchhedawng, bawlhhlawhna a khat, thatna lai reng reng awm lo kha, Kalvariah khenbeha tihhlumin a awm tih Lal Isuan a lo tlangaupui ta a ni.

          Chu ngei chu kan thinlungah a rawn thlen ve leh chuan thianghlimnain a rawn keng ve ta a. Thlarau Thianghlim ngeiin min kaihthawh ve tâk avangin, Pathian chu nungin kan hmu ve ta a ni. A hmel hmu thei turin Kristaah siam thar kan lo ni. A va ropui tehlul em! Chu ngei chu Tirhkoh Paula’n thlarauva tlangauvin, “Thil tha ti atan Krista Isuaah chuan siam awmin, ama kutchhuak kan ni” a lo tihna chu. A va ropui em!

          Awle, thil siam thar kan tih hian, Tape recorder te, TV te leh thil tam tak an siamchhuak a. Nimahsela, khawvel mihringte hian thil reng reng an siamchhuah aiin, a siamtu hi kan en ber thin a ni. Tape Recorder kan lei dawn chuan ‘Made in Japan’ tih a chuan kalh loh chuan kan ngaih a tha thei tlat lo. Sawrkarin thlawhna lei dawn se ‘Made in France’ tih a chuan kalh loh chuan a ngaih a tha thei lo. Thil reng reng hi India siam aiin Japan siam kan dah chungnung daih zawk a ni. Unaute u, nang leh kei hi ‘Made in Japan’ mai ni lovin, khawvel leh planet pumpui lo siam chhuaktu Chungnungbera Pathian kutchhuak kan ni a, chu Chungnungbera chuan Ama chenna turin min lo buatsaih reng a lo ni. A va ropui tehlul em! Gulf War Indona lo rik hma leh indo an tan hma khan, multi-national force ho thlawhnate kha inring em emin an intlar thup mai a. An fighter chhuan tawlawl rual zawng zawngte kha, Kuwait chhanchhuaka indo tur leh rammu turin an inbuatsaih sung sung mai a, indo a lo chhuak ta a, khang an fighter rual tha tak tak an hman takah leh an stealth bomber ten leihnuai puk an verh tak tak mai kha chuan Saddama pawh zamin a tlawm ta a nih kha.

Awle, unaute u, heng zawng zawng aia ropui he Krista sipai rualte hi Pathian mithmuhah chuan kan mawi daih zawk a ni. Setana Lalram chhutchhiatna tur chuan heng hmanraw tha tak takte ai hian nang leh kei hi kan hlu zawk a ni.

Chuvangin, kan hai reng reng loh tur chu zawlnei ropui tak tak Pathianin a buatsaih tawh Mosia te, Zawlnei Elija te, ral hma a zam ngai reng reng lo Kaleba te, Pathianin a lo thuam thin a. Nimahsela, tun hun hnuhnungah hian, Hebrai ziaktu’n “Chung rinna avanga tuartu zawng zawngte chu, keini tellova tihfamkima an awm lohna turin” a lo tih ang khan, zawlnei zawng zawngte leh Apostol 12 te, Pathianin mi ropui tak tak a lo kohchhuahte ai khan, nang leh kei hi Pathian mithmuhah kan ropui zawk a ni. Tun hun hi a ni Tirhkoh Paula ten châk em em leh nghakhlel em em a, thlarauva an lo hmuh lâwk, nimahsela, a hun ala nih loh avanga, “A hun lova piang ka ni” an lo tih chhan kha ni. Chuvangin, zawlnei kal hmasa leh ralhrat khawkheng Joshua te leh Kaleba te ai khan tunah hian i te biklo tih hria ang che.

A chhiartute’n he Kraws nang leh keia thianghlimna awmchhun hi kan hmuh theihna tur leh kan chan theihna turin nangma ngaihdan phum bo vekin chu Krista Kraws chu engtiklai pawhin au turin ka chah duh che a ni. Lal Isuan ‘NUNNA THING’ hi khawiah mah a phun tawh loh avangin ‘NUNNA THING’ Lal Isua Kraws hi i chawisang zel ang u.

Kan Pa In, Thlarau Thianghlima kan kir leh theihna turin Lalpa’n a thuchah hi malsawm rawh se. Amen.