Hnahlan Biakbuk Hawn Chanchin

      H. Lalmuanpuia, Secretary, Central Youth Evangelical Front

 

       Ni 04.10.2014(Inrinni) khan a hawn hun nghakhlel taka kan thlir Hnahlan Biakbuk, Cheng Nuai 22 chuang senga sak chu hawn ani ta. Biakbuk hawnna hi a ropuiin Lalpa thlante tana ni chhinchhiah tlak tak ani. Biakbuk hawng tura inbuatsaihna atan hian Champhai Division nu leh pate an buai hle a. Hnahlan khawtlang pawh Biakbuk hawn tur thawmin a khat mup mup a. YMA branch in mikhual hmuah dan tur zawng zawng ruahmanna an siam vek a, thlen dan tur pawh an kutah a awm vek bawk ani.


 

        Dt. 03.10.2014(Zirtawp Ni) tlai dar 2:00 ah Hnahlan Community Hall ah Lalpa Chhiahhlawhte lawmna hun buatsaih a ni a. Hall chhungah hian YMA, MHIP, MUP etc. ten lawmna parthi an awrh tir a, Hnahlan VCP, Pu Kapchhuanthangan chair lain, Hnahlan Presbyterian English School Principal, Pu Thangromawia’n lawmna thusawiin, Hnahlan Cultural Club ten Chheihlam thiam takin an entir zui nghal a. Hnahlan English Medium School naupangten lam an rawn entir leh bawk. He mi zawhah Lalpa Chhiahhlawh chu thusawi turin sawm ani a. Thu a sawi hmain Hnahlan YMA Section pali, MHIP, MUP leh Hnahlan YMA Branch tan Tarpouline pakhat theuh a hlan a. A chenna hlui Mual veng section hnenah Inverter leh Battery lian pahnih a pe bawk a ni. Cultural Club Rs. 3000, School naupangte Rs. 3000 leh Vety Dept. Rs.3000 theuh a pe a, heng bakah hian VC hnenah Rs.5000 a hlan bawk.


 

        Dt. 04.10.2014 (Inrinni chhun) dar 12:00 ah Lalpa Chhiahhlawhin Hnahlan Biakbuk a hawng ta a. Lalpa hnena Biakbuk thar hlanna leh malsawmna a nei nghal a.Hemi zawh hian Hnahlan Community hall ah hun hman chhunzawm ani.

 

 Programme awm dan:

 

Tan Hun                  : 1:00 Pm

Venue                      : Community Hall, Hnahlan

Chairman                 :  R.L. Hmachhuana Executive Secretary,

Announcement         : A awm apiang

Hymn by all             : A duh apiang hla thlan

Tech. Report           : H. Lalvuana, Secretary, Building Advisory Board

Hla sak hona            : Pu Lalpianga, Chairman, Champhai Division

Message                  : Lalpa Chhiahhlawh, Dr. L.B. Sailo

Hla thlan                  : Pu Thuamluaia, Secy., Champhai Division

Vote of Thanks        : Lalhnehzova, Chairman, Hnahlan Local Church

Benediction             : Pi Lalzirliani

 

RUAI   : 3:00 PM

                Ruai atan hian Bawng 3, Vawk 5 leh Ar Kg 50 siam ani. Ruai fatu te chuan mipui 3500 chuangin kan ei niin an sawi. Hnahlan Pu Lianzika, kum 86 mi chuan, “Kum 80 chuang ka lo ni ve ta a, Hnahlan khuaah hian hetiang anga ruai theh ropui hi a la awm ngai lo va, a awm leh tawh pawh ka ring lo,” a ti hial a ni.

 

        Sunday ah hian Community hall ah inkhawm ani leh a. TV ah live ani bawk.       Hemi ni hian Dr. L.B.Sailo chuan thuchah a sawi a. Thenkhat chuan, “Pu Biakmawia hi chu a huaisen ngawt mai, kan kohhran hruaitute hian Pathian tirh ka ni ti ngam tumah an awm ve lo, midang sawi chhawn a sawi ve lo va, kum 1983 chhova Kalvari chanchin a sawi tho kha belh nei lovin a la sawi reng a ni,” a ti a. An YMA president Pu Zauva pawhin, “Dr. LB Sailo hi hetiang taka kan hmuahna chhan hi kan khaw tlangval a nih vang mai a ni lo, hlemhletna leh eirukna laka kut bawlhhlawh ve lo, midik, Zoram siam that duhtu a nihna hi a ni,” a ti! Amah vek chuan, “Zanlai Au Aw hi hun rei tak atang khan ka lo chhiar ve tawh thin, Tual Upa ni mah ila a sermon hian min hneh thei hle a ni,” a ti bawk.

       

Hnahlan Biakbuk Hawnnaa Jerusalem Leh Division Atanga Mihring leh Lirthei Kal Zat:Zoram hmun hrang hrang atanga he hun hmang tura unaute leh lirthei kal zat chu hetiang hi a ni:

 

Jerusalem atanga kal zawng zawng: Mihring-485, Bus-7, Sumo-6, LMV-44, Two wheeler-23.

Division atanga kal zawng zawng: Mihring-425, Bus-1, Sumo-12, LMV-24, Two wheeler-14.

 

Total

Palai zawng zawng   :       910

Lirthei zawng zawng:       131