Engvanga zirtirte hnenah pawh sawi si lova, he hmeichhe hnenah hian a inpuan tak mai le? A chhanna chu he hmeichhia tluk hian zirtirten Messia an nghakhlel ve lo a ni. Hmangaih Johana erawh chuan, a tuihalna rûk, han zawh rawih chu ngam bawk si lova a lo pehhel thin, Messia ni ngeia a lo hriat kha, a ri ngei pawhin a hre ta. Messia a ni tih a inpuan lai te hian Johana chuan ava ngaisang dawn em! A awm ngheng ngatin a thu thin reng  a ni. Thil mak deuh ka hrilh ang che, he Samari hmeichhia anga tuihal hnenah chuan tunah ngei pawh Messia hian khawvel hi fangin ala inpuang zel tih hi.      

                                   

          Bible chhungah hian thu phuah mawi em em mai, han chhiar zawng pawha thlum dap mai hi a inzep chiat a. Chung zinga mawi ber pakhat chu Hmangaih Johanan, “Pathianin khawvel a hmangaih em em a, chutichuan a Fapa mal neih chhun a pe a. Amah chu tupawh a ring apiang an boral lohva, chatuana nunna an neih zawk nan,”(Joh 3:16) a han ti mai hi a ni. Han chhiar zawm la, “Khawvel thiam loh chantir turin Pathianin a Fa khawvelah a tir lo, khawvel amah avanga an dam theihna turin a tir ani zawk e,” tiin.  Hengte hi i tan leh ka tana ziak a ni tih Johana hian a sawi chiang kawp mai, “Heng hi Isua chu Krista, Pathian Fapa a ni tih in rinna tur leh, in rin a, a hminga nun in neihna turin ziak a ni.”(Joh  20: 31) a ti.    

 

          Lal Isua khawvela a lo  lan  hma hian Rama te, Mahavira te, Buddha te,  Mohamada te etc. mihringte’n Pathian anga zui an lo ngah tawh a, chungte chu sakhaw hmuchhuaktu ang pawhin an sawi theih ang. Nazareth tlangval hian a hmaa lo kal zawng zawngte kha ruk hmangte, suam hmangte an ni vek tih a sawi a. Ani erawh chuan, “Kei zawng nun an neih nan, tam taka an neih nan, lo kal ka ni,” a ti. A mawi i ti ve lo maw? Nun kan neih nan, tam taka kan neih nana lo kal a ni. Khawvel hi Pathian fate tan chuan a hrehawmin a khawharthlak thin a. Mahse tihduhdahna te, hmuhsitna te,endawngna te tuar thin mah ila kan hneh ta tlat mai hi ava mak  em! Nun tam tak kan neihna turin Messia chu a lo kal, Kalvari tlangah a nunna chu min pek tawh vang a lo ni reng mai. Amah Krista thihna chiah chuan min lo tihlum tawh a, tunah chuan amah Krista chu keimahniah a lo nung ta reng mai si a. Kan mihring ngaihtuahna atanga kan zeldin thubawl ni lo hian thlamuanna leh hlimna, sual nawmchenna mihringin kan hlimpui thin ang ni lo, van lawmna zawkin kan khat thin. Khawvela thil thleng zawng zawng te,mahni chunga lo thleng thin te, zawhna chhan theih loh zawng zawng te nen lam hriat thiam theihna min petu chu chatuana chawimawi a va phu em!

 

          Hmangaih Johana nuna thil langsar ber mai chu ‘Unau inhmangaihna’ hi a ni.Tisaa inunauna lek fang hi ni lo, amah Krista thisena inunauna, rinnaa unau kara inhmangaihna lo piang ta hi Johana chuan, “Kan inhmangaih tawn chuan Pathian keimahniah a awm reng ang a, a hmangaihna pawh keimahniah a famkim bawk ang. Hmangaihna nei lo chuan Pathian a hre lo, Pathian chu hmangaihna a ni si a,” a ti hmiah mai zu nia. Chuvangin thlaraua kan ro viau chuan hmangaihna hi kan tlachham tihna a lo ni. Krista chuan a hmangaihna chuai ngai lo chuan min chhung khat rawhse.

 

          Hmangaih Johana hi zirtirte zingah a damrei ber a. A unaute zawng zawng an thih tawh hnuin, khawhar takin Patmos thliarkarah, lunginah an khung a. A tan chuan khawvel a thim vek tawh a. A hmangaih Lalpa hnen thlen theihna tura daidangtu chu a marphu det det chauh chu a ni tawh a. Rinnaa a unaute awmna pawh a hre pha tawh lo. Amah chauhin tuifinriat ralah, khawmual tereuhte, tan-in khawhar, Patmos thliarkar an tih ah chuan a hun tawp nghakin a thu reng a. Hetia khawhar em ema a awm lai hian, Krista chuan a vantirhkoh rawn tirin, Pathianin a bawihte hriattir atan a hnena a pek, thil lo awm lawk tur thu chu Johana hnenah ropui takin a rawn puang ta a ni.                            

                  

                   Hmangaih Johana hnena Lal Isua Krista thupuan chhuah hi ngun taka han chhiar chuan thil hlawm lian pui pui 15 he leia lo thleng tur hi kan hmu thei ang:-

 

  1. Kohhran 7 hnena thuchah.
  2. Kohhran kalsual (Apostasy), Krista tluksantu Kohhran ropui tak lo ding tur.
  3. Kohhran kalsual laka inthiar fihlim tura kohna hnuhnung.
  4. Kohhran kalsual, nawchizuar ropui tak leh a chunga chuang sakawlh (Anti-Christ).
  5. Chhinchhiahna 7 phelh leh a nghawngte.
  6. Sakawlh leh mithianghlimte indona.
  7. Khawpui atana Jerusalem hmangtu sakawlh leh sakawlh lalram lo ding tur leh mithianghlimte tihduhdahna rapthlak lo thleng tur.Tangka pakhat hman hun tur chu. A  hmangtu turte pawh an chalah emaw an kutah emaw chhinchhiah an ni ang.
  8. Tawtawrawt 7 leh a nghawngte.
  9. Kohhran kalsual (Nawchizuar ropui tak) leh a thurualpui sakawlh hremna: Pathian hremna  Berhbu 7 leihbuak.

10.Tawtawrawt 6-na leh Nuclear War lo thleng tur.

11.A puan hmawra Lalte lal leh Hotute hotu tih chuang; Puan thisen kai sin a; a hmingah pawh Pathian Thua tih inziak; Sakwr var chunga chuangin Sakawlh a rawn hnehna ropui leh mithianghlimte tana hnehna ropui lo thleng tur chu!

12.Thawhlehna hmasa leh  mithianghlim lawr.

13.Tawtawrawt 7 na leh Kum 1000 rorel leh Diabola/Setana tan ina khung.

14.Thawhlehna hnuhnung leh rorelna Lalthutphah var lo inhung chhuak tur.

15.Hremhmun (Meidil) leh chatuan (Vanram) lo inhawng tur chu!

    

              He thuchah lo chhiar phak apiangte hnena ka chah duh chu, Hmangaih Johana hnena Lal Isua thupuan hi khawvelah a lo thleng tan tawh a. Chuvangin tawngtaina thinlung nen, midang rawn lova, mahni tan ngei Bible (Thupuan) hi chhiar turin ka duhsak takmeuh che u a ni.  Reformer ropui, Martin Luthera leh a thiante avangin BIBLE  chu nangma pualin i nei thei a. Philosopher te, Scientist te, Theologian te etc. ngaihdan ah innghat duh suh. Lal Isua hrilhlawkna, Thupuana i hmuh te hi a thleng  tan mek a, a thleng dik vek dawn bawk tih hria ang che. Kei pawhin he thu ka ziah lai hian ka ngaihdan ka rawn lo.

                   

                   Zawlneite hrilhlawkna chauh pawh ni lo, Lal Isua Krista ngeiin Thupuana a lo hrilhlawk ang ngei hian Sakawlh Lalram hi a lo la ding dawn a.  Hrilhfiahtu tam tak chuan European Union hi Rome Lalram tluchhe tawh dinthar lehna a ni a, hei ngei hi a ni Sakawlh lalram tur chu an ti a.  Krista dodaltu (Anti-Christ) hian Jerusalem chu a lalthuthleng hunna ah hmangin (Daniala 11:45) khawvel hi ala awp dawn a.  A hnenah thiltihtheihna (Setanic Force and Setanic Wisdom) chu pek anih dawn avang leh amah ngei chu remna duh mi Krista (atakah chuan Krista der ni si) ah a inchhal dawn avangin he leia Kohhran ropui leh lian lian hian an zui ruih ruih dawn a ni.  Chu mai a ni hlei nem, sakhaw dangte pawhin a rawng an bawl dawn a ni.  Superman anih dawn avang leh thilmak tih theihna tinrenga thuam anih dawn avangin, “Heta hi Krista chu,”an ti hial dawn asin.

                   Tunah chuan he khawvela thuneihna (Authority) reng reng hi mi malah a inbawk lian sawt em em a.  Sorkarna lamah chuan USA President hian khawvel a awp a ni ta ber a;  Sakhuana lamah thung  chuan Pope hi sakhaw tinin hotu (Leader) enin an en thung.   Mizoramah pawh Bishop nihna mi pakhat hnena an hlan niah meuh chuan KOHHRAN  hrang hrang atangin Zaipawl (Choir) leh Band Party nen an rik mup mup kha.  Khang te kha  mipui chuan thil nih dan turah an ngai zel mai a ni. A tunlai alawm le! Thlarau lam tawnga nawhchizawrhna  a ni tih reng an hre lo. 

 

          Tunlai khawvel Kristiante hian Liberalism leh Secularism hi an thliar hrang thiam lova. Chuvangin chawhpawlh nun an hmang vek mai a ni.  Securalism chuan sakhaw  tin  tan zalenna a hawng a, mi tupawhin eng sakhua pawh an zui a thiang a, rinna kawngah Liberty a hawng a, a tha a ni.  Liberalism erawh chuan rinna (Faith) a tichhia a, chawhpawlh nun a hawng thung a ni.  He Liberalism (Setana hnathawh) lo thang duang zel hian Modernism nena inkawpin sakhaw intluktlanna leh sakhaw inpawmtawnna (Pluralism) a rawn hring chhuak ta hial a.  Rinna-a pasaltha, mithianghlim kal hmasate (Matin Luthera te, John of Arc te, Zwingli te, Watchman Nee te , E.G. White te, John Calvina te, Jessy Pen Lwiss te, Stanford te, William Booth te etc. etc. ) lo sual chhuah tawh,  Thlarau lam Independence chu a lo tlu chhe leh zo ta vek a nih hi !

 

          He thil rapthlak tak lo thleng tur hi lo hmu lawkin Paula chuan, “Tumahin engmahin tihder che u suh se; Tluksanna chu a lo thlen hmasak zet a Dan Bawhchhepa boral fapa chu a lo lan loh chuan chumi Ni (Krista lokal lehna Ni) chu a lo thleng dawn si lova,” (2 Thes.2:3) alo tih kha.  He Tluksanna rapthlak tak lo thleng mek hi Lal Isuan, “Chu khaw ropui chu thlarau lam thuah chuan Sodom leh Aigupta an ti a ni; chutah chuan an Lalpa pawh khenbeha a awm kha.” ( Thup.11:8) alo ti a.   Chuvangin chawhpawlh no dawmtute zinga i tel hian thlarauah Krista chu i khengbet nawn a ni tih lo hre tawh ang che.