Hebrai tawng chuan Ephesi tih awmzia chu ‘Ka duhlai’ tihna a ni awm e. Ephesi Kohhran, Pathian tana duhawmna a khat, Krista tâna invawng thianghlim an nih avanga mithianghlimte hnenah, Paula hian  lehkha thawnin, Pathian thuruk inthup tlat thin te chu a rawlruk teuh mai a, chungte chu kan chhui chhuak dawn a ni.

 LEILUNG PIANHMA Paula lehkhathawn ah hian, Pathianin a Fapa hmanga min thlanna chu kum 2000 zet liam ta ah mai khan ni lovin, leilung pianhma daih tawh ah zawk khan a ni, a ti tlat mai! Helai Pathian thuruk ropuizia hi zuk hmuhthiam ava chakawm em! Genesis kan en chuan, mihringte chu Eden huan pawnah hnawhchhuah an nih kha. Chumi hnuah mihringte tlanchhuah leh nan a Fapa khawvelah a rawn tir a ni tih hi, kan Bible hriatdan tlanglawn a ni mai a. Nimahsela, he Ephesi lehkhathawnah hian,  Pathian thurûk ropui tak mai Paula hian rawn sawichhuakin, mihringte chu sawi loh, lei leh van pawh a siam hma (leilung pianhma) daih khan, a Fapaah chuan min lo thlang fel diam tawh a ni tih a han sawi ta mai hi a va thûk em! Chu mai chu a ni hlei nem, van hmunah te khian thlarau lam malsawmsakna tinrengin a Fapaah chuan mal min lo sawm lawk diam tawh a nih chu!

 FAWKKHAWM Leilung pianhmaa min thlanna ah chuan, nakin hunbi kim khawsak hunah (Khawvel tawpah) phei chuan amah Krista-ah engkim leia mi te, lei hnuaia mi te, vana mi te, khawikipa mi pawh fawkkhawmin kan la awm vek dawn a, chu thurûk pawh chu leilung pian hma daih tawha Kristaa lo rel lawk vek tawh a ni tih Paula hian zu sawi thei a mawle!  ‘A thûkin , a va sâng em!’ hla siamtuin a tih angin heng thuruk inthupte puang chhuaktu hi fakin awm rawh se. Mihringte hian heng Pathian thurûk leh a chatuan remruatte hi kan hmuh loh chuan tuna kan dinhmun chau tak leh ninawm tak  atang hi chuan mihring nih hian manhla na reng a nei mawlh si lo va.

 PATHIAN ROCHAN Paula hian thil awihawm tak, mahse mahni kan in en apianga  phu loh luat vanga awih har deuh a sawi chhuah chu, thil siam dang reng reng ten an chan ve phak loh tur leh vana vantirhkoh te pawhin an chan ve phâk loh tur, mihringte tana a lo ruatlawk diam chu Pathian rochan kan la ni dawn tih hi a ni. Helai dinhmun hi kan hriatthiam theih tur zawngin tehkhin thu hmangin han hrilhfiah ta ila: Pain kan rochan chu kan fanaute bakah kan in leh lo leh kan rosumte chu ni ngei mahse, chungte aia kan ro hlu zawk chu kan nupuite hi an ni. Hemi tichiang em emtu chu thihna kotlangah meuh chuan rosum zawng zawng te pain a nupui kutah a dah thin a ni. Chutiang bawkin Pathianin a ro zawng zawng enkawl turin A FAPA-ah min lo thlang a, A Fapa ro luahpui turin a inpui nghâk atan min lo ruat lawk diam tawh avangin, chu dinhmun chu MO a tehkhin reng a ni. Roluahtu tur mai kan ni lo va, chatuana a ro relpui atan min lo thlang lawk diam tawh anih chu! Ava ropui em! I awih thei dawn em? Lal fanu nih ai chuan Lal fapa nupui, mo nih chu ropui tak zawk a ni ngei ang, Lalnu ala nih dawn tlat avangin. Hmeichhe dinhmuna ropui ber chu mo dinhmun hi a ni. Chu chu hrerengin Krista thisen avanga mihring te chanvo chu he mo nihna hian keng zo bera a lan avangin KRISTA MO tiin Bible hian a rawn tarchhuak reng a ni. Chu Mo nihna chu kan chanvo anih zia chu Thlarau Thianghlima chhinchhiah kan nihna hian a tichiang a, chu thlarau chu Pathian ropui zia fak nan ama ta ngei tlan chhuahna turin kan roluahna tura zakhamna a ni.