“ Davida lalthutthlengah a thu ang a, a ramah remnain   tawpintai a nei lo ang.”(Isaia 9:7.)         

             Chungnungbera chuan chunglam VAN atang khian ngun taka rawn thlirin, he khawvel mihring zingah hian a hmanrua tur leh a thian tur, a thinlung ang pumi a zawng a zawng thin a. Eden huana a mihring siamte an tluk tawh hnu kha chuan Pathian chu a khawharin, thian tur he leilungah hian a van em em a ni. Mi rinawm NOVA kha a han chhar fuh hlauh a, mahse Nova thih hnu kha chuan a ngai te bawkin Pathian chu thian nei lo leh khawhar takin a awm leh tho a ni. Chunglam atanga mit a len ruai ruai lai chuan, Ur khaw tereuh te chuan a mit a la ta em em mai, engvang nge? Engdang vang a ni lo va, chu Ur khuaah chuan mi rinawm, ABRAHAMA a hmuh hlauh vang a ni. Thian rinawm a chhar leh ta! A thian Abrahama hnenah chuan thu thlungin a chatuan remruatna hnuaia a fapa lo pian chhuahna atan hial he a thian rinawm hi a thlang ta a ni. Mal a sawm ta nghe nghe a, “Nang anchhe lawhtu apiang che chu anchhia ka lawh ang a, malsawmtu apiang che chu kei pawhin mal ka sawm ve ang,” a ti a ni. Abrahama a lo thih hnu khan Pathianin Abrahama hnena a thu lo tiam tawh chu kalpui zel mahse, thian bulfuk a tlacham tlat reng a. Abrahama thih hnua Pathian thian rinawm ber pakhat chu MOSIA a ni. Mosia nen hian hmaihmaah an inbe thin a. Mosia hnenah hian Pathian chuan lei leh van a din chhuah dan te, mihring a din chhuah dan te, lei leh vana thil awm tinreng a din chhuah dan zawng zawng te a hrilh vek a. Chu mai a ni hlei nem, khawvela sual lo luh dan te, mihring tlukchhiat dan zawng zawng te a hrilh vek a ni. Pathianin Mosia chu ka thian ti lovin, ‘ka chhiahhlawh Mosia,’ a ti thin a ni. Mosia thih hnu hian a ngai te bawkin Pathian chu khawhar takin a awm a, lei lam hawiin a mit a len ruai ruai thin a ni tih Bibleah kan hmu. Isaaka te, Jakoba te hun a lo liam a, a hnu ah SAMUELA hun a rawn inher chhuak leh ta a. Samuela hi Pathian lakah a rinawm em em a, mahse thian bulfukah a neih ve leh ve loh hriat a har hle mai. Pathian chuan zawlnei aia hnaivai thian tur a zawng thin a ni. A thian ni tur chuan a thinlung ang pu mi nih a ngai si a. Khawvel zawng zawng hrut chhuak a, a mit a len ruai ruai lai chuan khawvel hnamtin hi a hrutchhuak a. Beidawng taka a awm tawh hnuah Jakoba thlah hnam sawm leh hnam hnih lam a lo hawi leh a, hnam sawm leh hnam hnih zinga mi, Jesaia fapa, beram vengtu chu a beram venna hmunah a zuk chhar ta ! Chu beram vengtu chuan a beram ven pahin he hla mawi tak hi a lo sa a:

         “ Lalpa chu min vengtu a ni a, ka tlachham lo vang,

           Ani chuan hlobet hringdup hmunah te mi bawhtir thin a,

           Chawlhna tuikamah te mi hruai thin.

           Ani thihna hlim kawr-ruam zawh mah ila,

           Thil thalo reng reng ka hlau lo vang,” tiin.

             Chu aw danglam tak chuan Pathian thinlung khawhar tak chu vawilehkhatah a rawn chhun eng ta si a. Pathian hian a thinlung hahna te a sawi pui tur, a hlimna te a sawi pui tur leh a remruatpui tur thian a chhar ta. Mihringte chuan Pathian chu ropui tak leh lal tak, a duh ang anga thil siam chhuak a, tidanglam a, thunei taka che vel thin turah an ngai ngei ang a, mahse a ni lo. Ani chu mihring ang bawka lungngai thin, mangang thin, hlim thin, lawm thin, thinrim thin a ni si a. Pathianin beram vengtu tleirawl, a hming DAVIDA an tih chu a han belbul a, thianbul atan a siam nghal a, an inkawm ta heuh heuh mai a ni. Davida hnena Pathian inpuanna ropui bik em em mai chu, KALVARI CHANCHIN a ni. Krista Pathian nung Fapa lo lanna tur leh Kalvaria mihringte tan tlanna a rawn sin tur zawng zawng chu he a thian ngainatawm Davida hian thlarauvah a lo chang lawk vek zu nia. Hming zawng zawnga hming chungnungber neitu chu Nazaret Isua a ni a, minung leh mithi ngaihtuah tura a lokal leh hunah chuan Davida lalthutthleng a rawn luah ang a, a ramin kin ni a nei loving. Chu lei leh vana lalberin a rawn luah tur Davida lalthutthleng chu ilo thlir ho teh ang u.

 Israel lal, Davida lalthutthlengah thuin Krista chuan ro a la rel dawn tih Zawlnei Isaia hian chiang takin a sawi a. Tunah Vanah ro a rel a, van mipui te’n an lal chu chawimawina sang ber khumtirin an chawimawi reng tawh a, Pa pawhin lei leh vana thuneihna zawng zawng a lo pe daih tawh a ni. Chutichung chuan leiah hian a lalna a la lang chuang lo va, thim thuneihna lal chuan min la awp mup reng tho si a nih hi. Ani chu lei rorel turin a lokal leh dawn a, chutih hunah chuan Davida lalthutthleng chu a luah ang a, a lalram chu chatuan daih, chuai ngai tawh lo tur a ni ang(Daniela 7:14).

           Pathianin lal Saula a hnawl hnu khan, Davida hi lal atan hriak a thih a. Hriak thih anih hnu hian lalah a thu mai hauh lo. Lal Saulan hun rei tak ro ala rel a. Pathian thinlungah Davida chu lal ni tawh mahse Israel mipui thinlungah ala lal chuang lo. Pathian chuan hriak thih tawh mahse lal ni tur chuan mipuiin hriak an thih ve a ngai tlat. Saulan tlangah te pukah te thah tumin a hual a hual thin. Amah zawkin Lal Saula chu thahna hun remchang han hmu thin mahse Pathian hriakthih chungah kut thlak a duh si lo. Pathian hunruat a lo thleng a, Lal Saula leh a fate pathum, Jonathana, Abinadaba leh Malkesua te chu Philistiaho kutah an thi ta a; amah Saula tak hi chuan hmelma kuta thih a duh loh avangin a khandaih bawhin a intihlum a ni (I Samu. 31:4). Lal Saula leh a fate an thih hian Davida chuan tap chungin a sun a, a tah hla runthlak tak chu hetiang hi a ni:

        “ Aw  Isarael, I ropuina chu I hmun sangahte an that a,

          Mi liante an tluk tak hi!

         Gath-ah chuan hril suh ula,

          Askelon kawtthlerahte chuan puang suh u;

          Chutilochuan Philistia fanute an lawm ang a,

          Serhtan loh fanuho hlimin an au dah rual ang e.

          Nangni Gilboa tlangte u,

          In chungah dai leh ruah tla suh se, thilhlan turte chhuah hek suh;

          Chutah chuan mi lian phaw chu mualpho takin an paih si a,

          Saula phaw, hriak thih loh mi phaw ang maiin.

          Thahte thisen atang leh mi lian thau atangin Jonathana thal chu a let lo va,

          Saula thal chu a thlawnin a let ngai lo.

          Saula leh Jonathana nun dan chu a duhawmin a mawi a,

          An thih pawhin an inthen lo,

          Mupuite aiin an chak zawk a,

          Sakeibakneite aiin an chak zawk.

          Nangni Israela fanute u, Saula chu tah rawh u,

          Puan sen mawite a ban che u a,

          In puanahte rangkachaka cheimawinate beltu che u chu.

          Indo lai taka mi liante an lo tluk tak mai chu!

          In hmun sangahte Jonathana an that ta.

          Ka unaupa Jonathan, I chung thuah hian ka mangang a ni:

          Ka chungah I tha em em thin a,

          I mi hmangaihna chu a mak a,

          Hmeichhe hmangaihna a khum a ni.

          Mi liante chu an tlu a,

          Indona thuamhnawte pawh a boral zo ta !”

             Saula a lo thih hnu pawhin Davida hian lalthutthleng chu a chuh mai hauh lo va, Pathian rawn hmasain Pathian remtihna hnuaiah chauh lal turin Hebronah a chho a ni. A hma atanga lo zui tawhtu, Juda hnam chuan a chipuite an nih vang pawh a ni  ang, an lal atan an pawm nghal mai a. Kum 7 leh thla 6 Judate chungah chauh Hebronah hian a lal a ni. Lal Saula sipaite hotu Abneran Israelte lal atan Lal Saula fapa Isbosetha chu lalah a lo siamtir tawh avangin kum hnih chhung Israelte chungah Isbosetha chuan ro a rel a. A hnuah a sipaite hotu Abnera nen an intihthiamloh avangin Abnera chu Davida hnenah a inpe a, Israel mipuite pawh Davida lamah tang turin a fuih bawk a, a chhechham dan pawh hetiang hi a ni:  “Saula chhungte lak ata ram chu laksak a, Israel leh Judate chungah Dan atanga Beer-seba thlenga Davida  lalthutthleng tungding tura LALPAN  Davida hnena chhia a chham anga ka tih loh chuan, Pathianin Abnera chu a tih tihin ti sela, chu aia nasa pawhin,”(II Samu. 3:9,10)a ti a ni. Davida chhungte leh Saula chhungte hi hun engemawti chhung chu an indo a, Davida chhungte chu an chak tial tial a, Saul chhungte chu an chak lo tial tial a, a tawpah Davida chhungte chuan hnehna an chang ta a ni. Abnera ber Davida hnenah a rawn inpek tawh avang leh  Rekaba leh Baana kutah Isbosetha chu a thih tawh avangin, Israel upate chu Hebronah, Davida hnenah  lokalin thu an rawn thlung a, an lal atan Davida chu hriak an rawn thih ta bawk a ni (II Samu. 5:3).